Ҳукуматнинг «Ўзбекистон Республикаси Вазирлар Маҳкамасининг Регламентига ўзгартириш ва қўшимчалар киритиш тўғрисида»ги қарори лойиҳаси муҳокама учун жойлаштирилди. Лойиҳа ҳукуматнинг 2019 йил 22 мартдаги қарори билан тасдиқланган Вазирлар Маҳкамаси регламентига ўзгартириш ва қўшимчалар киритишни назарда тутади.
7-банднинг иккинчи хатбошиси «давлат бошқаруви бошқа органлари» деган сўзлардан кейин «Қорақалпоғистон Республикаси Вазирлар Кенгаши ҳамда маҳаллий ижроия ҳокимияти органлари» деган сўзлар билан тўлдирилади. Яъни, бош вазир ҳукумат олдига қўйилган мақсадли вазифаларга эришилишини таъминлаш мақсадида вазирликлар, давлат қўмиталари ва давлат бошқаруви бошқа органлари, шунингдек, Қорақалпоғистон Республикаси Вазирлар Кенгаши ҳамда маҳаллий ижроия ҳокимияти органлари фаолиятини умумий мувофиқлаштиради, юзага келган келишмовчиликлар бўйича келишилган қарорлар қабул қилади.
33-бандда биринчи хатбошиси «манфаатдор вазирликлар ва идоралар» деган сўзлардан кейин «Қорақалпоғистон Республикаси Вазирлар Кенгаши ҳамда маҳаллий ижроия ҳокимияти органлари» деган сўзлар билан тўлдирилади. Яъни, ишлаб чиқувчи томонидан тайёрланган Ўзбекистон Республикаси президенти ва Вазирлар Маҳкамасининг ҳужжатлари лойиҳалари манфаатдор вазирликлар ва идоралар, Қорақалпоғистон Республикаси Вазирлар Кенгаши ҳамда маҳаллий ижроия ҳокимияти органлари билан келишилиши керак.
Шунингдек, Регламент қуйидаги мазмундаги 13-хатбоши билан тўлдирилади: «Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан – ҳудудларни ижтимоий-иқтисодий ривожлантириш ва маҳаллий давлат дастурларига оид лойиҳалар».
Изоҳ (0)