Turkish Airlines авиакомпаниясининг Теҳрондан Истанбулга рейс амалга оширган самолёти бир нечта йўловчиларда коронавируси борлиги гумон қилинганлиги сабабли Анқарага жўнатилди. Бу ҳақда Туркия соғлиқни сақлаш вазирига таяниб, «РБК» хабар берди.
Нашрнинг таъкидлашича, 17 нафар йўловчида коронавирус борлиги гумон қилинмоқда, уларнинг тана ҳарорати юқори бўлган. Барча 132 нафар йўловчи ва экипаж аъзолари икки ҳафта давомида карантинда бўлади ҳамда тиббий кўрикдан ўтказилади.
Daily Sabah газетаси Туркия авиациясидаги манбасига таяниб хабар беришича, самолёт Туркия Соғлиқни сақлаш вазирлигининг илтимосига биноан Анқара аэропортига йўналтирилган.
Hurriyet газетаси Анқара аэропортига қўнган самолёт тасвирланган фотосуратларни эълон қилган. Суратларда лайнер олдидаги махсус кийимли одамлар ва тез ёрдам машиналарини кўриш мумкин.
Reuters томонидан кейинчалик берилган хабарга кўра, Туркия Соғлиқни сақлаш вазирлиги самолётдаги йўловчилардан ҳеч бирида коронавирус мавжуд эмаслигини маълум қилган.
Туркия 23 февралдан бошлаб коронавирус тарқалишидан қўрқиб Эрон билан авиақатновларни тўхтатди. Бироқ Туркия ўз фуқароларини Эрондан олиб чиқиш учун махсус рейслар ташкил қилган.
Эрон ҳудудида коронавирус аниқлангани 19 февраль куни маълум бўлди. Шу куни Эрон оммавий ахборот воситаларида ушбу касаллик ташхиси қўйилган икки кишининг вафоти ҳақида хабар берган.
Сўнгги маълумотларга кўра, Эрон соғлиқни сақлаш ва тиббий таълим вазири ўринбосари Ирож Харирчида коронавирус аниқланган. Ҳасан Руҳоний Эронда коронавирус ваҳимаси билан боғлиқ вазиятга изоҳ берди.
Арманистон бош вазири Никол Пашинян Facebook’даги саҳифасида Эронда коронавирус инфекцияси тарқалгани сабаб Арманистон Эрон билан чегарани ёпиб, авиақатновларни икки ҳафтага тўхтатганини маълум қилган. Туркия ҳукумати ҳам худди шундай чоралар кўришини маълум қилган. Афғонистон ва Грузия Эрон билан авиақатновларни тўхтатган, Покистон эса Эрон билан чегарани вақтинча ёпган.
Бундан ташқари, Баҳрайн коронавирус туфайли Дубай ва Шаржадан авиарейсларни қабул қилишни тўхтатди. Жанубий Кореяда коронавирус билан касалланганлар сони 977 нафарга етди. Австрияда коронавирус юқтириб олган дастлабки икки киши аниқланди. Францияда коронавирусга чалинган беморлар даволанишга муваффақ бўлди. Японияда давлат идораларига ходимларини уй шароитида ишлашга ўтказиш буюрилди. АҚШ апрель охиригача коронавирусга қарши вакцинани синовдан ўтказиши мумкинлиги маълум қилинди. Испаниянинг Тенерифе оролида коронавирус юқтириб олган меҳмон сабабли ичида минг киши бўлган меҳмонхона изоляция қилинди.