«Ташқи реклама бозорини тартибга солиш тўғрисида»ги Ҳукумат қарори қабул қилинди. Қарорга мувофиқ, энди ер участкаларидаги ташқи реклама объектлари учун 10 йил муддатга, давлат мулки бўлган бино ва иншоотлардаги ташқи реклама объектлари учун 5 йил муддатга ДХМлар орқали реклама жойлари паспортларини бериш бир марталик йиғим суммасини тўлаш орқали амалга оширилади.
Адлия вазирлигининг маълум қилишича, ер участкасига ўрнатилган видео экранли ташқи реклама объектлари учун кўрсатилган муддат қўшимча 10 йил муддатга узайтирилади.
Қонуний ўрнатилган ташқи реклама объектларини мазкур қарор талабларига мослаштириш учун 6 ой муддат берилди. Ушбу муддатда мослаштирилмаган реклама объектлари эгалари томонидан ихтиёрий равишда ўз кучи билан олиб ташланиши (акс ҳолда бу иш суд тартибида амалга оширилади) белгиланди.
Шунингдек, 2020 йил 1 мартдан бошлаб Тошкент шаҳрида ташқи рекламани жойлаштириш соҳасидаги фаолиятнинг алоҳида тартиби жорий қилинади. Бунда, ташқи реклама объектларини ер участкаларида жойлаштириш ҳуқуқи («E-ijro auksion» орқали) фақат юқори технологияли ташқи реклама объектларига берилади.
Қарор билан ташқи реклама объектларини ўрнатиш тақиқланган ҳудудлар белгиланди. Жумладан, тротуар ва пиёдалар йўлакларида ташқи реклама объектларини ўрнатиш тақиқланади.
Қарор билан ташқи реклама объектларини қуриш тартиби, қуриш учун бериладиган ер, бино ва иншоотлар рўйхатини шакллантириш, қуриш ҳуқуқини электрон аукцион орқали бериш тартиби тўғрисидаги низомлар тасдиқланди.
Мавзуга доир: Рекламачиларнинг «Ўзавтойўл»га «исён»и: Тошкентда «Тадбиркорларга халақит қилманг!» деб ёзилган ўнлаб баннерлар пайдо бўлди
Изоҳ (0)