Самарқанддаги тўй азага айланишига бир бахя қолди: қашқадарёлик 35 яшар фуқаро тўйга бориб, бир лаган ош учун таниши билан жанжаллашиб қолади. Тортишув пичоқбозликка бориб етади. Бу ҳақда «Замон» ахборот дастури хабар бермоқда.
Воқеа меҳмонларга тортиқ қилинаётган ош устида бошланди. Мислиддин қозон устида бир товоқ ош олмоқчи бўлганида жабрланувчи Азиз Қурбонов билан тортишиб қолади. Ўртадаги даҳанаки тортишувда Азиз ножўя сўзлар билан ҳақорат қилганидан дарғазаб бўлган Мислиддин уни гўё узр сўраш учун ташқарига олиб чиқади ва биқинига пичоқ уради.
Шундан сўнг ҳолсизланиб қолган йигитни уй ичига олиб кириб, яна икки маротаба шу ишини такрорлайди. Мислиддинни муқаррар қотилликдан куч ишлатиб, четга олган отаси сақлаб қолди.
Жиноят ишлари бўйича Тайлоқ туман судида мазкур иш кўриб чиқилиб, Мислиддин Жалиловга 6 йил қамоқ жазоси тайинланди.
Изоҳ (0)