Жанубий Кореянинг собиқ президенти Ли Мён Бак жуда катта миқдорда пора олишда айбдор деб топилди ва Сеул Олий суди томонидан 17 йил қамоқ жазосига ҳукм қилинди, деб хабар берди «ТАСС».
Суд унга нисбатан қамоқ жазосидан ташқари 15,7 миллион доллар миқдорида жарима тўлаши ҳақида ҳам қарор чиқарди.
Ҳозирда собиқ президент 78 ёшда. У аввалроқ ҳам коррупция учун жазоланган: 2018 йилда у ҳибсга олинган, ўша йилнинг октбрида суд уни 15 йилга озодликдан маҳрум этган.
Бироқ орадан бир ярим йил ўтгач, у саломатлиги ёмонлашгани туфайли қамоқдан озод этилган.
Мавзуга доир:
Собиқ президент ҳужжатларда авто эҳтиёт қисмлари сотиш билан шуғуллангани айтилган, аслида эса компания ҳисоб рақамидан йирик корпорациялар, хусусан Samsung Electronics’дан пора ундириш учун ишлатилган DAS компанияси билан алоқадорликда айбланган.
Samsung Electronics компания солиқ тўламагани учун жиноят иши очилишининг олдини олиш учун собиқ президентга пора бериб келган.
Эслатиб ўтамиз, Ли Мён Бакка нисбатан коррупция бўйича айбловлар 2018 йилда илгари сурилган эди. Ўшанда собиқ президентга нисбатан айбловлар Жиноят Кодексининг 16 та, хусусан порахўрлик, пул ўзлаштириш, солиқ тўлашдан бўйин товлаш, лавозимини суиистеъмол қилиш, сайлов қонунчилигини бузиш каби пунктларга асослангани айтилган эди.
Маълумот учун, Жанубий Кореяни Ли Мён Бакдан кейин, яъни 2013—2017 йилларда бошқарган собиқ президент Пак Кин Хе ҳам коррупцияда айбланиб, 24 йиллик қамоқ жазосига ҳукм қилинган. Унга 18 та банд бўйича айбловлар қўйилган, хусусан коррупция, пора олиш, мансабни суиистеъмол қилиш, шунингдек, давлатга доир маълумотларни ошкор қилиш шулар жумласидандир.
Изоҳ (0)