Афғонистоннинг амалдаги президенти Ашраф Ғани мамлакатда бўлиб ўтган президент сайловларидаги овозларнинг якуний ҳисоб-китобидан кейин расман ғолиб деб тан олинди. Бу ҳақда мамлакат Мустақил сайлов комиссияси (МСК)га таяниб, «РИА Новости» хабар бермоқда.
МСК маълумотларига кўра, Ашраф Ғанига сайловчиларнинг 50,64 фоизи овоз берди ва у иккинчи муддатга президент этиб сайланди.
Иккинчи ўринни 39,52 фоиз овоз билан ҳукуматнинг амалдаги раҳбари Абдулла Абдулла эгаллади. Мамлакатнинг собиқ бош вазири «Ҳизб ал-Исломий» (Афғонистон Ислом партияси) етакчиси Гулбиддин Ҳикматиёр эса 3,85 фоиз овоз тўплади.
Афғонистондаги президент сайловлари 28 сентябрда бўлиб ўтган эди. Дастлабки натижалар эълон қилинганидан сўнг Шикоятлар ва даъволар бўйича комиссияга 16,5 мингга яқин шикоятлар келиб тушган.
Иккинчи ўринни олган Абдулла Абдулла сайлов натижаларини тан олмай, овозларнинг қайта ҳисобланишини талаб қилганди.
Изоҳ (0)