Ўзбекистонда Beeline мобил алоқа операторининг мижозлар базаси 2019 йил тўртинчи чораги ҳолатига кўра, 8,1 миллион одамни ташкил этди. Бу ҳақда операторнинг асосий таъсисчиларидан бўлган VEON’нинг 14 февраль, жума куни эълон қилинган ҳисоботида маълумот берилган.
Ушбу кўрсаткич 2018 йилдаги натижадан (9,1 миллион) 10,7 фоизга кам. Компания ушбу қисқаришни мунтазам равишда маблағ сарфламайдиган мижозларнинг тармоқдан чиқиб кетгани билан боғлиқлигини билдирган.
Ўзбекистондаги умумий даромад 8,8 фоизга камайиб, 579 миллиард сўмни ташкил этган. Бунга асосий сабаб сифатида мобил алоқа учун акциз солиқлар ставкасининг 15 дан 20 фоизга чиқарилгани кўрсатилган. EBITDA 24,8 фоизга ўсиб, 317 миллиард сўмга етган. Бу яхши операцион кўрсаткичлар билан боғлиқлиги тушунтирилган.
2019 йил кузида Beeline мижозлар базаси камайган ва 8,4 миллион абонентни ташкил қилган — ўшанда компания ушбу ҳолатнинг сифат билан боғлиқлигини билдириб, «қуйи даражада»ги абонентлардан воз кечилганини маълум қилганди.
«Ўзбекистонда асосан абонентларнинг қийматига эътибор қаратамиз», — дея вазиятга изоҳ берганди VEON’нинг стратегик масалалар бўйича директори Александр Казбеги.
Изоҳ (0)