Ўзбекистонга қўшни бўлган мамлакатлардаги олий таълим муассасаларида ўқиётган ва ўқишини Ўзбекистондаги ОТМларга кўчириш истагини билдирган талабаларга Ўзбекистоннинг мазкур давлатлардаги элчихоналари ёрдам беради. Бу ҳақда Олий ва ўрта махсус таълим вазирлиги хабар берди.
Маълум қилинишича, Ўзбекистон Республикаси таълим муассасаларига ўқишга қабул қилиш бўйича Давлат комиссиясининг 2020 йил 4 февралдаги 12-сонли баёни билан Тожикистон, Қирғизистон ва Қозоғистондаги олий таълим муассасаларида таҳсил олаётган ўзбекистонлик талабаларга ўқишини Ўзбекистонга кўчириш бўйича ариза қабул қилишга рухсат берилди.
Унга кўра, Ўзбекистон Ташқи ишлар вазирлиги томонидан ўқишини кўчириш истагини билдирган ва ўқиши кўчирилишга рухсат берилган фуқароларга ўқиётган хорижий олий таълим муассасаларида тегишли ҳужжатларни олиш билан боғлиқ юзага келадиган муаммоларни бартараф этишда Ўзбекистоннинг қўшни давлатлардаги элчихоналари ва ваколатхоналари орқали амалий ёрдам кўрсатилади.
Аввалроқ Ўзбекистонда тест синови топширмай ўқишга кириш имконияти пайдо бўлишии маълум қилинди. Шунингдек, Ўзбекистонда ҳукумат қарори билан талабаларга стипендия тўлашнинг янги тартиби жорий қилинди. Мазкур тартибга кўра, 2019 йилнинг сентябрь ойидан бошлаб, беш ой давомида «аъло» ва «яхши» ўқиган талабаларнинг стипендиясидаги тафовут давлат бюджети ҳисобидан қопланадиган бўлди. «Контрактдаги талаба»лар эса ўзлаштириш кўрсаткичидан қатъи назар базавий стипендия олиши белгиланди.
Изоҳ (0)