Россия истеъмолчилар ҳуқуқларини ҳимоя қилиш ва инсон фаровонлиги соҳасидаги федерал хизмат («Роспотребнадзор») Ўзбекистон ва Қозоғистонга янги коронавируснинг лаборатория диагностикаси воситаларини топширди. Бу ҳақда ташкилот сайтида хабар берилди.
Россиянинг кимёвий таҳлил учун асбоб-ускуналардан иборат тест тизимлари ўзбекистонлик ва қозоғистонлик мутахассисларга 1, 2 февраль кунлари етказиб берилган. Худди шундай ускуналар Қирғизистон ва Тожикистонга ҳам етказиб берилиши кутилмоқда.
Арманистон ва Беларусга ҳам тест тизимлар етказилган.
Россия Евросиё иқтисодий иттифооқи ва МДҲга аъзо мамлакатларга ёрдам доирасида диагностика воситаларини бепул етказиб берди. Тест тизимлар «Роспотребнадзор»га тегишли «Вектор» вирусология ва биотехнология илмий маркази томонидан ишлаб чиқилган.
Аввалроқ Россия коронавирусни атрофдагилар учун хавф туғдирувчи касалликлар рўйхатига киритгани ҳақида хабар берилган эди. Ҳозирда Хитойда коронавирус туфайли вафот этганлар сони 361 нафарга етди.
Маълумот учун, Хитойдан келган Ўзбекистон фуқаролари 14 кун муддатга тиббий назоратга олиниши маълум қилинди.
Изоҳ (0)