Президент Шавкат Мирзиёев Олий Мажлисга Мурожаатномасида 2020 йил номи — «Илм-маърифат ва рақамли иқтисодиётни ривожлантириш йили»да белгиланган соҳаларни устувор даражада ривожлантириш ва ислоҳ этиш бўйича устувор йўналишларни белгилаб берди.
Давлат раҳбарининг таъкидлашича, олий маълумот оламан, ўз устимда ишлаб, илмли бўламан, деган, юрагида ўти бор жўшқин ёшларнинг таҳсил олиши учун ҳамма қулайликлар яратиб берилиши шарт.
Кўпроқ грант ўринлари, қизлар учун алоҳида
«Шунинг учун, мактаб битирувчиларини олий таълим билан қамраб олиш даражасини 2020 йилда камида 25 фоизга ва келгусида 50-60 фоизга етказамиз. Бу борада шуни унутмаслик керакки, олий таълим қамровини ошириш, тўлов контрактига боғлиқ бўлиб қолмаслиги зарур», — деди Президент.«Шуни ҳисобга олиб, олий ўқув юртларига талабалар қабул қилиш давлат грантларини 2 баробар кўпайтирамиз, десам, сизлар бу фикрга қандай қарайсиз? Қизларимиз учун алоҳида грантлар ҳам ажратилади. Хотин-қизлар қўмитаси ушбу грантлар асосида ўқитишга номзодларни танлаш ва саралаш мезонларини ишлаб чиқиши керак», — дея қўшимча қилди Президент.
Осон имтиҳонлар
Президентнинг таъкидлашича, олий таълим муассасаларига кириш имтиҳонларини ҳам оптималлаштириш зарур. Бунда асосий эътибор ўқишга кириш жараёнларини соддалаштиришга, олий ўқув юртларида чинакам билим ва тарбия олишга қаратиш лозим.Мисол учун, она тили бўйича билимни баҳолашнинг миллий тест тизимини яратиш лозим. Ёшлар исталган вақтда имтиҳон топшириб, тегишли гувоҳнома олса, ўқишга кираётган пайтда она тили бўйича қайта синовдан ўтишга ҳеч қандай эҳтиёж қолмайди.
Олий таълим стандартлари хорижий тажриба асосида такомиллаштирилади, таълим йўналишлари ва ўқитиладиган фанлар қайта кўриб чиқилади. «Мутахассисликка алоқаси бўлмаган фанлар сони 2 баробар қисқартирилади», — деди Президент.
Олий таълимда ўқув жараёнини кредит-модул тизимига ўтказиш талаб этилади.
ОТМларга мустақиллик
«2020 йилдан педагогик таълимнинг 6 та йўналиши бўйича, ўқиш муддати 3 йил қилиб белгиланади. Бу ишларни бошқа йўналишларда ҳам давом эттирамиз», — деди Президент. Олий ўқув юртларига босқичма-босқич академик ва молиявий мустақиллик берилади.2020 йилда уларнинг 10 таси ўзини ўзи молиявий таъминлашга ўтади. «Бундан ташқари, камида 5 та олий таълим даргоҳини конкурс асосида танлаб, нуфузли хорижий олий таълим даргоҳлари билан ҳамкорликда, уларни трансформация қилишни бошлаймиз», — дея қўшимча қилди Шавкат Мирзиёев.
Мавзуга доир:
- Тошкентда ерости силкинишлари сезилди. Бу вақтда Президент прописка тизими ҳақида гапираётган эди
- Шавкат Мирзиёев — Евросиё иқтисодий иттифоқи билан ҳамкорлик ҳақида: «Халқ вакиллари нима деса шу бўлади»
- Шавкат Мирзиёев 2020 йилни «Илм-маърифат ва рақамли иқтисодиётни ривожлантириш йили» деб эълон қилди
Изоҳ (0)