Қашқадарё вилоятининг Ғузор туманида фаолият юритувчи метан «заправка» газга ноқонуний уланиб, 49 кун ичида давлатга 1 миллиарддан ортиқ зарар етказди. Бу ҳақда «Дарё»га МИБ Қашқадарё вилоят бошқармаси хабар беряпти.
«Ўзтрансгаз» АЖ Қашқадарё вилояти бўйича газ таъминоти ҳудудий филиалининг мансабдор шахслари улгуржи истеъмолчиларнинг газ ҳисоблагичлар кўрсатгичларини кузатиб, етарли даражада таҳлил қилмагани боис, табиий газнинг талон-торож бўлишига йўл қўйиб берган.
Хусусан, «Ҳудудгаз таъминот» АЖ ва «Ўзстандарт» агентлиги Қашқадарё синов ва сертификатлаштириш маркази давлат корхонаси мутахассислари билан ҳамкорликда ўтказилган текширишда, Ғузор туманидаги «TAZIB» МЧЖга қарашли автомобилларга газ тўлдириш компрессор шохобчаси (АГТКЧ)да ўрнатилган газ ҳисоблаш ускунаси конфигурациясининг босимлар фарқи калибровкасига ўзгартириш киритиш йўли билан 2019 йил 1 августдан 2019 йил 18 сентябрга қадар яъни 49 кун давомида ташқи таъсир ўтказилиб, 1 миллиард 31 миллион 683 минг сўмлик 1031683 м3 табиий газ ноқонуний равишда истеъмол қилинганлиги аниқланган.
Ҳолат юзасидан далолатнома расмийлаштириб, шохобча газ тармоғида узиб қўйилган эди. Шундан сўнг МЧЖ давлатга етказилган зарарни ҳамда тармоққа қайта улаш учун тўловларни амалга оширди ва жорий йилнинг 22 январь куни тармоққа қайта улаб берилди.
Изоҳ (0)