Буюк Британия қироличаси Елизавета II «Брекзит» ҳақидаги қонунни имзолади. Қонун мамлакатга 2020 йил 31 январда Евроиттифоқдан чиқишга имкон беради. Бу ҳақда Meduza хабар берди.
Маълум қилинишича, 24 январь, жума куни Брюсселда бўлиб ўтадиган маросимда ҳужжат Европа кенгаши ва Европа комиссияси раҳбарлари томонидан имзоланади. Шунингдек, қонун Европарламент томонидан ратификация қилиниши керак.
Дастлаб «Брекзит» 2019 йилнинг март ойига режалаштирилган эди, бироқ Буюк Британия парламенти ва ҳукуматининг Евроиттифоқдан чиқиш шартлари юзасидан келиша олмагани сабабли жараён бир неча марта ортга сурилди.
2019 йилнинг декабрь ойида «Брекзит»ни тезроқ амалга ошириш тарафдори бўлган бош вазир Борис Жонсоннинг Консерватив партияси парламент сайловида ишончли ғалабага эришди.
Қонун лойиҳаси 22 январь, чоршанба куни Лордлар палатаси томонидан қабул қилинган ва имзолаш учун қиролича Елизавета II га жўнатилган эди.
Изоҳ (0)