Эроннинг Кирмон шаҳрида генерал Қосим Сулаймонийнинг дафн маросимидаги тиқилинчда 35 киши ҳалок бўлди, дея хабар бермоқда Associated Press агентлиги Эрон давлат телевидениесига асосланиб. «Интерфакс»нинг Эрон ТВга асосланиб қўшимча қилишича, тиқилинчда 190 киши тан жароҳати олган.Тиқилинч мотам юриши бошланганидан сўнг юз берган, унда иштирок этиш учун Кирмон (Сулаймонийнинг она шаҳри) кўчаларига қанча одам чиққанига аниқлик киритилмаяпти.
Тўлдириш: Эроннинг Fars агентлиги шифокорлар берган маълумотга асосланиб хабар беришича, тиқилинч оқибатида ҳалок бўлганлар сони 40 кишига, жабрланувчилар сони 213 кишига етган.
Associated Press’нинг аниқлик киритишича, Теҳронда 6 январь куни бўлиб ўтган мотам юришида миллиондан ортиқ одам иштирок этган. 4 январь куни Бағдоднинг шиалар яшайдиган ҳудудида ҳам генерал билан видолашув бўлиб ўтган эди.
Генерал Қосим Сулаймоний 3 январь куни, АҚШ авиазарбаси оқибатида ҳалок бўлган эди. Пентагон баёнотига кўра, эронлик генерал АҚШ президентининг буйруғига кўра ўлдирилган — Трамп Сулаймонийни биринчи рақамли террорчи деб атаган эди.