Ижтимоий тармоқларда С.М. исмли аёлнинг «Ўғлимни ўлдирганлар кўпчилик бўлса-да, лекин бир кишининг бўйнига қўйишмоқчи» сарлавҳа остидаги аудиоёзуви тарқалди.
Мазкур аудиоёзувда арз қилган аёл С.М. 30 яшар ўғли Ж.Х.ни бир неча шахс ваҳшийларча ўлдиргани, битта гумонланувчи Россияга қочириб юборилгани, унинг паспорти олиб қўйилмагани, қон таҳлилида бошқа одамнинг қони чиққани, тергов нотўғри қилингани, экспертиза хулосасига кўра қон таҳлилида унинг ўғлиникидан ташқари яна уч кишининг қони борлиги, улар орасида ўғлини уйидан олиб чиқиб кетган боланинг қони йўқлиги, бу бола воситачи бўлиб, ўғлини ўлдирганлар бошқа эканлигини билдирган.
Бош прокуратура матбуот котиби Ҳаёт Шамсутдиновнинг «Дарё»га маълум қилишича, 2019 йилнинг 27 сентябрида соат 18:00 ларда Яккабоғ тумани, «Алақарға» қишлоғида жойлашган ошхона рўпарасида Ж.Х. бош қисмининг энса соҳасида ўткир санчиб кирувчи жисм билан етказилган тан жароҳати билан ҳушсиз ҳолатда топилган.
Мазкур ҳолат юзасидан шу куни Жиноят кодексининг 25, 97-моддаси 1-қисми (Қасддан одам ўлдиришга суиқасд қилиш) билан жиноят иши қўзғатилган.
Ж.Х. кўрсатилган тиббий муолажаларга қарамасдан 29 сентябрь куни шифохонада вафот этган.
Судга оид тиббий экспертизанинг хулосасида Ж.Х.нинг ўлими «бош миянинг очиқ шикастланиб, оғир даражали лат ейиши, бош мия тўқимасига ва мия қоринчаларига қон қуйилиши, ўнг чакка пешона суякларининг ботиб синиши» каби жароҳатларнинг кечиши жараёнида ривожланган ўткир юрак қон-томир етишмовчилигидан келиб чиққанлиги кўрсатилган.
Тўпланган тергов ҳужжатларига кўра, ушбу жиноятни олдиндан бўлган келишмовчилик туфайли Ш.С. содир этганлиги аниқланган.
Тергов натижасига кўра, Ш.С.га Жиноят кодексининг 97-моддаси 1-қисми (Қасддан одам ўлдириш) билан айблов эълон қилиниб, қамоқ эҳтиёт чораси қўлланилган. Жиноят иши 31 декабрь куни айблов хулосаси билан Жиноят ишлари бўйича Чироқчи тумани судига юборилган.
Прокуратура хабарида таъкидланишича, ҳозирда жиноят иши судда кўрилмоқда.
Изоҳ (0)