Жорий йилнинг ўтган 11 ойи ҳолатига кўра, республикада пенсия олувчилар сони 3 302 195 нафарни, ижтимоий нафақа олувчилар сони эса 359 666 нафарни ташкил этмоқда. 2019 йил учун пенсия тўловларига Молия вазирлиги ҳузуридаги Бюджетдан ташқари пенсия жамғармаси ҳисобидан 26,2 триллион сўм, нафақа ва компенсация тўлови учун эса давлат бюджети ҳисобидан 2,7 тириллион сўм ажратилган. Бу ҳақда 18 декабрь, чоршанба куни Ахборот ва оммавий коммуникациялар агентлигида «Бюджетдан ташқари пенсия жамғармаси томонидан 2019 йилда амалга оширилган ишлар ҳамда 2020 йилга белгиланган асосий вазифалар» мавзусида ўтказилган матбуот анжуманида маълум қилинди, дея хабар бермоқда «Дарё» мухбири Миролим Исажонов.
Тадбирда жамғарма бошқарма бошлиғи Нуриддин Содихўжаев «суюнчи пули» ва дафн нафақаси кимларга қанча миқдорда берилишига оид саволга атрофлича жавоб қайтарди.
«Бола туғилганда бериладиган ва дафн маросими учун тайинланадиган нафақалар барча фуқароларга ажратилади. Фақат одамлар туғилганлик ва ўлим тўғрисидаги маълумотномаларни олиб келиши кифоя. Бу борада «кам таъминланган», «боқувчисини йўқотган», деган тушунчалар кетмайди», — деди Нуриддин Содихўжаев.
Маълум қилинишича, жорий йилнинг ўтган даври ичида дафн нафақаси бўйича 140 мингта мурожаат бўлиб, бунга 118 миллиард сўм маблағ ажратилди. «Суюнчи пули»га эса 710 мингта мурожаат қилинган ва бунинг учун 298 миллиард сўм пул сарфланган. Дафн маросимига энг кам иш ҳақининг 4 баравари, бола туғилганда бериладиган нафақага эса энг кам иш ҳақининг 2 баравари миқдорида маблағ ажратилади.
Нуриддин Содихўжаевнинг сўзларига кўра, айни пайтда мазкур ҳолатлар юзасидан мурожаат қилган фуқароларга қулайликлар яратиш мақсадида тизимли ишлар олиб бориляпти. Тажриба сифатида республиканинг 14 та туман ва шаҳридаги давлат хизматлари марказлари орқали мурожаатлар қабул қилинмоқда. 2020 йилнинг февраль ёки март ойидан бошлаб эса ушбу жараён тўлиқ автоматлаштирилиши режалаштирилмоқда.
Изоҳ (0)