Республика шошилинч тиббий ёрдам илмий маркази Қашқадарё филиалига жорий йил 25 ноябрь куни тунги соат 02:40 да бир оиланинг 5 нафар аъзоси ис газидан заҳарланган ҳолда келтирилди, деб хабар берди Соғлиқни сақлаш вазирлиги ахборот хизмати.
Қайд этилишича, Қарши шаҳри «Кат» маҳалласидан 37 ёшли Ш.Т., 32 ёшли Г.Х., 13 ёшли Ш.Н., 11 ёшли Ш.Н. ва 4 ёшли Э.Н. хонадонда кўмир ёқиш натижасида ис газидан ўрта оғир даражада заҳарланган.
Маълум бўлишича, хонадон соҳибининг кечқурун кўмир чўғида кабоб тайёрлагани ва қолган чўғни уйга олиб кириб қўйганлиги мазкур нохуш ҳодисага сабаб бўлгани айтилмоқда. Айни пайтда беморларга малакали тиббий ёрдам кўрсатилмоқда.
Шунингдек, 26 ноябрь, сешанба куни тахминан соат 22:00 ларда Қарши тумани Парғуза қишлоғида яшовчи Ш.Б. хонадонида тўрт киши ис газидан заҳарланганлиги қайд этилди.
Аниқланишича, ушбу нохуш ҳодисага тандирда ёқилган ўтин чўғи уйга олиб кирилганлиги сабаб бўлган.
Мазкур оиладан хонадон соҳиби, 45 ёшли Ш.Б. енгил заҳарланган, унга амбулатор ёрдам кўрсатилган. Оиланинг бошқа аъзолари 41 ёшли Т.В., 17 ёшли Ж.Т., 9 ёшли Ш.Т. ис газидан ўткир заҳарланиш ўрта оғир даражаси ташхиси билан республика шошилинч тиббий ёрдам илмий маркази вилоят филиалига ётқизилган.
Беморларга тажрибали шифокорлар томонидан малакали тиббий ёрдам кўрсатилмоқда.
Аввалроқ Андижон ва Тошкент вилоятларида бир кунда олти кишининг ис газидан заҳарлангани ҳақида хабар берилган эди. Кўнгилсиз ҳолатларнинг олдини олиш мақсадида Ёнғин хавфсизлиги бошқармаси фуқароларни иситиш мосламаларидан фойдаланишда ҳушёр бўлишга чақирди.
Изоҳ (0)