Ироқда 60 нафардан ортиқ полиция офицери намойишларда фуқароларга нисбатан куч ишлатгани учун суд қилинди

Ироқда 66 нафар полиция офицери норозилик билдираётган халқни тарқатиш вақтида одамларга нисбатан керагидан ортиқ куч ишлатиб, зўравонлик қилгани сабаб суд қилинди. Бу ҳақда «Коммерсантъ» хабар берди. Октябрда бошланган норозилик намойишларида ҳалок бўлганлар сони 301 нафарга етган, яна 15 минг нафар фуқаро яраланганди.

Ироқ ҳукуматининг расмий вакили Саъд ал-Ҳадисийга кўра, 1600 нафар намойишларда иштироки учун ҳибсга олинган махбуслар озодликка чиқарилган. У, шунингдек, намойишчиларга нисбатан ўқотар қуролдан полициячилар эмас, балки акцияларда иштирок этаётган учинчи томон вакиллари фойдаланганини қайд этди. Ҳадисий ҳужум уюштирган «яширин кучлар» кимлиги борасида аниқ фикр билдирмаган.Ироқ бош вазири Одил Абдул-Маҳди норозилик намойишлар туфайли вазирлар даражада жиддй ислоҳот ва ўзгартиришлар қилишни ваъда берган. Ҳукумат раҳбари сайлов тизимида ислоҳотлар ўтказмоқчи. Ироқ конституциясига ўзгартиришлар киритилиши мумкин.Ироқдаги ҳукуматга қарши намойишлар 1 октябрда бошланган. 2 октябрда Ироқ ҳудудининг 75 фоиз қисмида интернет ўчириб қўйилган ва 11 октябрда қайта ишга туширилганди. Маълум вақт танаффусдан сўнг яна қайта бошланган норозиликларда полиция ҳамда халқ ўртасида кучли тўқнашувлар кузатилган. Намойишчилар вилоятлардаги сиёсий партиялар офислари, маҳаллий ҳокимликлар ва дипломатик ваколатхоналар биноларини ёқишга уринган ва уларнинг айримларига ўт қўйган. 5-ноярбда Бағдодда ва Ироқнинг бошқа вилоятларида мамлакатда давом этаётган норозилик намойишларининг кучайгани сабаб интернет яна ўчириб қўйилди. Интернетни ўчириб қўйилиши Ироқ ҳукуматига 1 миллиард АҚШ долларидан ортиқ зарар етказган.