Шаҳар маҳаллий ҳокимлиги вакиллари Венецияда сувнинг баландлиги 187 сантиметргача кўтарилганини маълум қилди. Бу ҳақда «ТАСС» хабар берди.
Венецияда ҳар тўрт йилда бу каби тошқинларнинг кузатилиши ва сув сатҳининг кўтарилиши одат тусига кирган. Лекин одатга кўра сув 110 сантиметрдан баландга кўтарилмасди ва шаҳарнинг 10 фоиз қисмида тошқин муаммосидан азият чекарди.
«187 сантиметр. 1966 йилдаги 194 сантиметрлик рекорддан кейинги энг ёмон натижа», — дея ёзган Венеция мерияси Twitter’да. Маҳаллий ҳокимлик вакилларининг маълумотига кўра сув сатҳи 140 сантиметрдан ошган ва шаҳарнинг 90 фоиз қисмини эгаллаб олган.
Твитга илова қилинган схемага кўра, сув сатҳи баландлиги бир неча кун давомида гоҳ камайиб гоҳ кўпайиб туради. График бўйича тунда сув сатҳининг баландлиги 145 сантиметргача кўтарилади.Венеция маҳаллий ҳокимлиги саёҳат лайнерларининг шаҳарга киришини тақиқлаган. Шаҳар мери Луижо Бруняно сувнинг кўпайиши глобал исиш билан боғлиқлигини қайд этди ва Италия ҳукуматидан кўмак сўраганини билдирди.
Мерия Венето вилояти бошқарув органларидан инқироз ҳолати, Рим ҳукуматидан эса фавқулодда ҳолат режими эълон қилишни сўраган.
Сув тошқинлари оқибатида шаҳарда яшовчи икки нафар фуқаро ҳалок бўлган. Сув офатининг биринчи қурбони 78 ёшли қария бўлиб, у сувга тўлган хонадонида электрнасосни ишга туширмоқчи бўлган вақтида ток уриши оқибатида вафот этган. Яна бир қурбон эса Пеллестрина мавзесида яшовчи фуқаро бўлган. Шаҳарда мактаблар ёпилган, телефон алоқасида узилишлар кузатилмоқда.
Изоҳ (0)