Молия вазирлиги ҳузуридаги бюджетдан ташқари Пенсия жамғармаси ижро этувчи аппарати томонидан Тошкентда сохта ҳужжатлар билан пенсия олиб келаётган фуқаро аниқланди. Бу ҳақда Пенсия жамғармаси матбуот хизмати «Дарё»га хабар берди.
Қайд этилишича, 30 сентябрь куни Тошкент шаҳар, Миробод туманида яшовчи фуқаро Б.Б. томонидан ҳеч қанақа расман ишламаган турмуш ўртоғининг ҳужжат сохтакорлиги билан шуғулланиб, катта миқдордаги пенсия олиб келаётганлиги ҳақидаги маълумотлар баён қилинган ёзма мурожаати келиб тушган.
Ижро этувчи аппарат ходимлари томонидан мазкур мурожаат юзасидан Ўзбекистон Республикасининг «Жисмоний ва юридик шахсларнинг мурожаатлари тўғрисида»ги қонуни 19-моддасида белгилаб қўйилган талабларидан келиб чиққан ҳолда, ахборотнинг давлат органлари, ташкилотлар ходимлари ва улар мансабдор шахслари томонидан ошкор этилишига йўл қўйилмаслиги ҳақида ариза муаллифига тегишли жавоб хати йўлланди.
Аммо, Тошкент шаҳар, Миробод туманида яшовчи фуқаро Б.Б.нинг турмуш ўртоғи Б.Ф.нинг ёшга доир пенсия иши Ижро этувчи аппаратнинг малакали мутахассислари томонидан қайта ўрганиб чиқилди. Аниқланишича, ҳақиқатдан ҳам фуқаро Б.Ф.га 2008 йилнинг 7 августидан эътиборан, тақдим қилган ҳужжатларига асосан 35 йиллик иш стажи ҳисобидан ёшга доир пенсия тайинланган бўлиб, унинг пенсия миқдори 2019 йилнинг 1 августидан 1,1 миллион сўмни ташкил қилган.
Фуқаро Б.Ф.нинг тақдим қилган пенсия ҳужжатлари бўйича Фарғона вилояти Ёзёвон туман давлат архивида сақланаётган Фарғона вилояти «Қишлоқхўжаликкимё» АЖнинг 1975—1993 йиллардаги иш стажлари ҳамда унинг мазкур корхонадан 1982—1986 йилларда тўланган ойлик иш ҳақлари тўғрисидаги маълумотлари шунингдек, 1993—2004 йиллардаги меҳнат фаолияти даврлари Тошкент шаҳар Яккасарой туманидаги «Сунур сервис» МЧЖ сақловидаги буйруқлар китоби ҳамда ойлик маошлар китобидан солиштириб ўрганилди. Фуқаро Б.Ф.нинг исми-шарифи ҳамда унга тегишли маълумотлар ҳам ўз тасдиғини топмаганлиги натижасида, фуқарога 71,9 миллион сўм миқдоридаги пенсия тўлови амалдаги қонунчиликка зид равишда тўланганлиги аниқланди ҳамда ёшга доир пенсия иши ўрганиш кунида рад этилди.
Ҳозирги кунда, фуқаро Б.Ф. томонидан ўзлаштирилган 71,9 миллион сўмдан 32,1 миллион сўми Жамғарма ҳисобига фуқаро томонидан ихтиёрий равишда қайтарилган бўлиб, ўтказилган ўрганишлар юзасидан тўпланган текшириш материаллари ва ҳужжатлар ҳуқуқий баҳо бериш учун ҳуқуқни муҳофаза қилиш идораларига тақдим қилинди, дейилади хабарда.
Изоҳ (0)