Самарқанд шаҳри 3 ноябрь куни Ўзбекистонда илк марта ўтказилаётган Халқаро хайрия ярим марафонига мезбонлик қилади.
«Дарё» мухбирининг воқеа жойидан хабар беришича, ярим марафон йўлаги Самарқанд шаҳрининг марказий кўчаларидан ўтади. Югуришга Регистон майдони ёнида старт берилиб, финиши чизиғи ҳам худди шу ердан кесиб ўтилади.
Югуришнинг йўналиши бўйича иштирокчилар Мирзо Улуғбек мадрасаси, «Шердор» мадрасаси, «Тиллакори» мадрасаси, «Руҳобод» мақбараси, «Гўри Амир» мақбараси, «Афросиёб» шаҳарчаси, «Ҳазрати Хизр» мақбараси, «Хўжа Дониёр» мақбараси, Мирзо Улуғбек расадхонаси, Шоҳи-Зинда ансамбли, Сиёб бозори, Биби Хоним масжидлари ёнидан ўтади.
Йўналиш Халқаро марафонлар ва югуришлар ассоциацияси (AIMS) томонидан тасдиқланган.
21,1 километр йўналишининг ўлчаб чиқилиши AIMS’нинг сертификатланган ўлчагичи ёрдамида амалга оширилади.
Мусобақада 12 ёшдан бошлаб 2 километргача, 16 ёшдан бошлаб 10 километргача ва 18 ёшдан бошлаб 21 километргача иштирокчилар қатнашади. Низомда Самарқанддаги мусобақанинг барча қоидаларини топиш мумкин.
Ярим марафондан тушган маблағлар Тошкент театрларидан бирида кўриш қобилияти заиф ва кўзи ожиз инсонлар учун қулай муҳит яратиш бўйича экспериментал лойиҳани амалга оширишга йўналтирилади. Ушбу дастур тифлоизоҳлаш (аудиодескрипция) ёрдамида пьесани театр саҳнасида намойиш этилишини ўз ичига олади.
Изоҳ (0)