Жорий йилнинг октябрь ойи давомида «Ўзнефтгазинспекция» томонидан республикада газдан ноқонуний фойдаланиш ва аҳолига суюлтирилган газ етказиб бериш бўйича ўтказилган тадбирлар натижасида катта ҳажмда газ ўғирланиш ҳолатлари аниқланди, деб хабар беради Энергетика вазирлиги матбуот хизмати.
Дастлабки ҳисоб-китобларга кўра, етказилган зарар 4 миллиард 778 миллион сўмни ташкил этди.
Умуман олганда жорий йилнинг 1 октябрдан 25 октябргача ўтказилган тадбирлар натижасида республика бўйича 208 та ҳолат аниқланиб, 3 миллиард 885 миллион сўмлик 4 миллион 209 минг метр куб газдан ноқонуний равишда фойдаланиб зарар етказилганлиги маълум бўлди.
Хусусан, Фарғона ҳамда Жиззах вилоятида жойлашган «Зафаробод агроэкспорт» ва «Қувасой шаффоф оҳак» корхоналарига қарашли оҳак ишлаб чиқариш цехида жами 1 миллиард 690 миллион сўмлик, 1 миллион 873 минг метр куб, шунингдек, Тошкент вилоятида жойлашган «Вайт Керамик» МЧЖга қарашли чинни цехида жами 128 772 метр куб табиий газдан ноқонуний фойдаланилганлиги аниқланди.
«Суюлтирилган газни газ баллонларда аҳолига тарқатишга келсак, тадбирлар натижасида 13,1 миллион сўмлик 3,9 тонна камомад, 9,5 миллион сўмлик 2,8 тонна ортиқчалик, 12,5 миллион сўмлик 3,7 тонна асоссиз ҳисобдан чиқариш, 155,9 миллион сўмлик 46,5 тонна истеъмолчилар ҳақидан уриб қолиш ҳисобига ўзлаштирилганлиги маълум бўлди.
Шуни таъкидлаш керакки, 2019 йилнинг бошидан 2500 дан ортиқ табиий газдан ноқонуний равишда фойдаланиш ҳолатлари ҳамда суюлтирилган газни газ баллонларда тарқатиш бўйича 200 дан ортиқ ҳолатлар аниқланган бўлиб, тегишли чоралар кўриш учун ҳужжатлар ҳуқуқни муҳофаза қилиш органларига топширилди.
Сиқилган ва суюлтирилган газдан фойдаланиш қоидаларига риоя қилиш бўйича тадбирлар давом этмоқда», — дейилади хабарда.
Изоҳ (0)