Давлат ветеринария қўмитаси ветеринария хизмати назоратидан ўтказиш талаб қилинадиган маҳсулотлар импорти тартибини ўзгартиришни кўзда тутувчи Президент қарори лойиҳасини муҳокама учун эълон қилди. Бу ҳақда Spot хабар берди.
Қарор лойиҳасида айтилишича, Ўзбекистонда истеъмолчиларни хавфли ва сифатсиз импорт маҳсулотларидан ҳимоя қиладиган самарали тизим мавжуд эмас.
Шу сабабли, сифати кафолатланмаган ва потенсиал хавфи бўлган ҳайвон маҳсулотларининг импорт қилиниши натижасида турли касалликлар тарқалиши ҳолати учрамоқда.
Натижада республикада эпизоотик ҳолатнинг ёмонлашиш хавфи ортмоқда, хусусан, ҳайвонлар ва истеъмолчилар орасида юқумли касалликларни қўзғатувчиларнинг тарқалиши хавфи ортмоқда.
2020 йилнинг 1 январидан янги тартиб ўрнатган ҳолда муаммони бартараф этиш таклиф қилинмоқда.
Янги тартибга кўра, Давлат ветеринария қўмитаси томонидан назоратдан ўтказиладиган маҳсулотлар импорти шундай маҳсулотларни ишлаб чиқарувчи, қайта ишловчи ва сақловчи ташкилотлар ва юридик шахслар реестрига киритилган ташкилотлар, юридик шахслар ва хорижий экспортчилар томонидан амалга оширилиши мумкин бўлади.
Шунингдек, ветеринар дори маҳсулотларининг импортига уларнинг яроқлилик муддати умумий муддатнинг 80 фоизидан ортиқ бўлган тақдирда рухсат берилади ва Ўзбекистон давлат ветеринария хизмати томонидан берилган ветеринар гувоҳнома мавжуд бўлганда расмийлаштирилади.
Давлат ветеринария хизмати назоратидан ўтказилиши керак бўлган маҳсулотлар импортини амалга ошириш учун рухсатнома 90 кунга берилади ва бунинг учун базавий ҳисоблаш катталигининг бир баравари миқдорида тўлов ундирилиши режалаштирилмоқда.
Ветеринария хизмати назоратидан ўтказиладиган маҳсулотлар рўйхати сўнгги марта 2017 йилда тасдиқланган. Мазкур рўйхатга 2000 дан ортиқ маҳсулот киритилган.
Янги тартиб юқорида қайд этилган муаммоларни бартараф этишга, республика ҳудудини ўта хавфли инфекцияларни қўзғатувчиларнинг тарқалиши ва олиб кирилишидан ҳимоя қилишнинг самарали тизимини яратишга ёрдам бериши кутилмоқда. Шунингдек, Ўзбекистонга яроқлилик муддати ўтган ветеринар дори воситаларининг олиб кирилиши ва савдосининг олди олиниши кўзланмоқда.
Изоҳ (0)