Нидерландияда муаллифлик ҳуқуқи эгаларининг илтимосига кўра, Россиядаги 80 фоиз лицензиясиз фильмларни намойиш этадиган сайтлар фойдаланиб келган Moonwalk плеерининг серверлари ўчириб қўйилди, деб хабар беради «Kod.ru».
18 октябрь куни Нидерландияда муаллифлик ҳуқуқини ҳимоя қилиш фонди (BREIN) сайти Moonwalk плеери серверлари ўчириб қўйилишини маълум қилганди. Киберхавфсизлик соҳасидаги Group-IB тадқиқот компанияси бу борадаги ишларни 2013 йилда бошлаган. Ташкилот сервисни ёпиш учун суд ижрочилари, «Ижодкорлик ва кўнгилочар альянс» (АCE) ҳамда «Америка кинокомпаниялар ассоциациялари» (MPАА) билан ҳамкорликда иш олиб борган.
Европа ва Америка муаллифлик ҳуқуқи эгалари нафақат серверларни ўчиришга, балки далилларни қўлга киритиш, шунингдек, Moonwalk’ка алоқадор учта нидерланд ва иккита хорижий юридик шахс маълумотларини топширилишига муваффақ бўлган. Бунинг оқибатида рус тилида фаолият юритувчи «қароқчи» сайтларнинг асосий контенти йўқолиб қолган.
Маълум қилинишича, биринчи навбатда KinoGo, HDrezka, Onvix, «ГидОнлайн», «БасКино» ва бошқа бир қатор сайтлар муаммога дуч келган. Мазкур сервислар аксарият ҳолларда ягона юклашни мувофиқлаштириш тизими билан ишлаган. Бунинг учун сайтга кодларни жойлаштириш керак бўлган халос.
BREIN’нинг таъкидлашича, шунга қарамай Moonwalk серверларида 26 мингдан ортиқ фильмлар ва 10 мингга яқин сериаллар қолмоқда — серверлар ўчирилишидан бир ой олдин Moonwalk ўз кутубхонасида 2,5 мингга яқин контент йиғишга улгурган. Ҳар минг маротаба кўрилган видео учун плеер 0,6 доллар тўлаган. Плеер эгалари ушбу пулларни рекламалар, асосан, ноқонуний онлайн-казинолар орқали олиб турган.
Муаллифлик ҳуқуқи эгаларининг маълумотларига кўра, Moonwalk’даги 50 та энг машҳур сервисга ҳар ой 89,9 миллион фойдаланувчи 395 миллион маротаба кириб турган.
Изоҳ (0)