Uzbekistan Airways авиакомпаниясининг «Нью-Йорк—Тошкент» йўналиши қатнови билан парвоз қилган йўловчи самолёт бортида тўполон қилди, деб хабар беради авиакомпания матбуот хизмати.
21 октябрь, душанба куни «Нью-Йорк—Тошкент» йўналиши бўйича парвоз амалга оширган ҲЙ102 қатновини пойтахт аэропортида Транспортда жамоат хавфсизлигини таъминлаш бошқармаси ходимлари кутиб олди.
Маст ҳолатда бўлган 51 ёшли эркак самолёт бортида тўполон кўтариб, ўз жойини эгаллаш ҳақидаги танбеҳларга эътибор бермасдан, уни тинчлантирмоқчи бўлган борткузатувчиларни ва атрофда ўтирган йўловчиларни ҳақорат қилган.
«У ўзининг ножўя ҳаракатлари билан парвоз хавфсизлигини, шу билан бирга, барча йўловчилар ва экипажнинг ҳаётини хавф остига қўйди. Қатнов йўловчилари экипажга ёрдам кўрсатди ва қоидабузарни ўриндиққа боғлаб қўйишга тўғри келди. Тошкент шаҳрига етиб келгандан сўнг авиатўполончи Ўзбекистон Республикаси Транспортда жамоат хавфсизлигини таъминлаш бошқармаси ходимларига топширилди», — дейилади хабарда.
Uzbekistan Airways авиакомпанияси матбуот хизмати йўловчилардан «Йўловчининг ҳаво кемаси ичидаги юриш-туриш қоидалари» билан танишиб чиқиб, унга риоя қилишни сўради.
«Қатнов йўловчиларидан ноқулайликлар учун узр сўраб, экипажга кўрсатган ёрдамлари учун миннатдорчилик билдирамиз», — дейилади хабарда.
Изоҳ (0)