Республика қурилиш объектларида фойдаланилаётган цемент маҳсулотларинининг сифати ва хавфсизлигини ўрганиш ишлари олиб борилди, деб хабар бермоқда Ўзстандарт агентлиги.
Ўрганиш натижасида қурилиш объектларида 10 турдаги цемент маҳсулотларидан намуналар олиниб, аккредитланган синов лабораториясида стандарт талаблари асосида 28 кунлик синовлар ўтказилган. Стандарт талабларига асосан цемент маҳсулотларининг маркасини аниқлаш учун 28 кунлик синовларни ўтказиш талаб этилади ва бу синовлар цементнинг сифати ва хавфсизлигини аниқлашда асосий кўрсаткичлардан бири ҳисобланади.
Синов натижасида 3 турдаги цемент маҳсулотлари босимда оғирликка чидамлилик кўрсаткичлари бўйича стандарт талабларига мувофиқ келмади. 3, 7, 28-кун ўтказилган синовларда стандарт талаблари бўйича кўрсаткичлар кузатилди. Кузатувлар натижасида, амалда 500 маркалик цемент маҳсулоти 255 маркага тўғри келган.
Ўтказилган ўрганиш натижалари юзасидан цемент маҳсулотлари синовини тўлиқ ўтказиш учун Ўзстандарт агентлиги томонидан ягона синов дастури тасдиқланган ҳамда мониторинг қилувчи идора томонидан ишлаб чиқарувчилар ва импорт қилувчи ташкилотларга тегишли тавсиялар юборилган.
Аввалроқ Ўзстандарт Ўзбекистонда 2019 йилда салкам 3 миллиард сўмлик импорт маҳсулотининг талабга жавоб бермаслиги аниқланганини маълум қилган эди. Шунингдек, агентлик мамлакатга электротехника маҳсулотлари импортини чеклашни, аввал фойдаланилган кийимлар, техника, эҳтиёт қисмлари ва шиналар импортини тақиқлашни, 2020 йил 1 январдан миллий мувофиқлик белгиси бўлмаган товарларни сотишга тақиқ қўйишни кўзда тутувчи ҳукумат қарорлари лойиҳаларини муҳокамага қўйган эди.
Изоҳ (0)