Европа Чемпионлар Лигасида грандлар жанги: «Боруссия Д» — «Барселона» учрашуви ҳақида

17 сентябрь, сешанба куни Европа Чемпионлар Лигасининг гуруҳ босқичи старт олади. Қуръадан сўнг «ўлим гуруҳи» дея таъкидланган «Ф» гуруҳида «Боруссия Д» ўз майдонида «Барселона» билан баҳс юритади.

Каталонларга бу сафар ҳам осон гуруҳ дуч келгани йўқ. Ўтган йили «Барселона», «Тоттенҳэм» ва «Интер» жамоалари ўртасидаги кураш қандай бўлгани кўпчиликнинг ёдида бўлса керак. Бу мавсумда «шпорлар» ўрнини боруссияликлар эгаллади ва немислар ўйин борасида мусобақанинг амалдаги финалчисидан қолишмайди. Тўртинчи жамоа эса — «Славия». Бу жамоа ном жиҳатидан буюк бўлмаса-да нималарга қодир эканини ўтган мавсум Европа Лигасида озми-кўпми намойиш қила олди.

Эътиборли жиҳати бу икки жамоа 21 йил деганда илк бор ўзаро тўқнаш келмоқда. 1998 йилги УЕФА Суперкубогида «Барселона» ўша вақтда Чемпионлар Лигасида ғолиб чиққан «Боруссия»дан устун келганди.

«Боруссия Д»

Жамоа янги мавсумда фақат бир марта «қоқилди», дортмундликлар «Унион»га қарши сафар ўйинида имкониятни бой бериб қўйди. Бироқ Фавр шогирдлари ўз майдонида юз фоизлик натижа кўрсатмоқда. Бундеслигадаги сўнгги баҳсда «арилар» жиддий рақиб ҳисобланган «Байер»ни йирик ҳисобда мағлуб этди. Шунингдек, жамоа ўзининг сермаҳсуллиги билан ҳам ажралиб турибди.

«Сигнал-Идуна Парк»даги мухлисликни узоқ тарифлаш шарт эмас. Дортмунд ишқибозлари ўз уйларида ҳар қандай рақибни қўрқувга сола олади. Буни Лионель Месси ҳам ўйиндан аввал алоҳида таъкидлаб ўтди. «Барселона»га қарши ўйин немис клуби тўпурари Пако Алькасер учун принципиал аҳамиятга эга ҳисобланади. Эрнесто Вальверде қўл остида ўйин амалиётисиз қолган футболчининг қалбида ўзига хос спортча алам қолиб кетгани табиий.

«Барселона»

Эрнесто Вальверде шогирдлари мавсумни барқарор тарзда бошлай олмади, бундан ташқари, жамоанинг етакчилари жароҳат сабаб сафдан чиққанди. Мазкур ўйинда Усмон Дембеле, Нето ва Самюуэль Умтити каби футболчилар каталонларга ёрдам бера олмайди. Катта эҳтимол билан Лионель Месси ҳам учрашувда тўлиқ ҳаракат қила олмайди. Бир ойдан буён жамоасига ёрдам бера олмаяётган Месси шанба куни «Валенсия»га қарши ўйинни ҳам ўтказиб юборди. Бироқ эртаси куни «Барса» матбуот хизмати аргентиналик футболчи Дортмунддаги ўйинга тайёр экани маълум қилинди. Шунингдек, Усмон Дембеле собиқ жамоасига қарши ўйинда майдонга туша олмайди.

Бироқ «кўк-анорранглилар» ишқибозларини хурсанд қиладиган воқеалар ҳам бор. Ла Лига 1-турида жароҳат олиб бир неча муддат сафга қайта олмаган Луис Суарес «Валенсия»га қарши ўйинда майдонга тушди ва дублни расмийлаштирди. Шунингдек, мазкур баҳсда 16 ёшли Ансу Фатининг ҳаракатлари «Камп Ноу»да минглаб томошабинлар олқишига сабаб бўлди.

Қизиқарли фактлар

• «Боруссия» ва «Барселона» ўз чемпионатларининг энг сермаҳсул (ҳар бир ўйинда ўртача учта гол) жамоалари ҳисобланади. Дортмундликлар ортда қолган тўртта турда 13 та тўп киритган бўлса, каталонлар ҳисобида 12 та гол бор
• «Барселона» Ла Лигада тўпга эгалик қилиш бўйича етакчи — ўртача 65,4%. «Боруссия» эса бундан озгина камроқ кўрсаткичга эга — 61,4%
• Бу жамоалар қўпол ўйин кўрсатмаслик борасида ҳам ажралиб туради: «Барселона» бу мавсум тўртта турда 7 та сариқ карточка жамғарди (бир ўйинда ўртача 1,7). «Боруссия» футболчилари эса ўтган тўртта ўйинда бор-йўғи битта сариқ карточкага лойиқ кўрилган
• «Боруссия» сўнгги ўнта уй ўйинининг саккизтасида ғалабага эришган
• «Барселона» сўнгги олтита сафар учрашувнинг бор-йўғи биттасида муваффақият қозонган (учта дуранг ва иккита мағлубият)

Тахминий таркиблар