Ўзбекистон қишлоқ ҳудудларида давлат хизматларини тақдим этишни такомиллаштириш ва бошқарув даражасини ошириш лойиҳасига старт берилди
«Ўзбекистоннинг қишлоқ ҳудудларида давлат хизматларини тақдим этишни такомиллаштириш ва бошқарув даражасини ошириш» лойиҳасига старт берилди. Бу ҳақда Давлат хизматлари агентлиги матбуот хизмати «Дарё»га хабар берди.
Лойиҳа Ўзбекистон Республикаси Адлия вазирлиги, Европа Иттифоқи, Давлат хизматлари агентлиги ҳамда Ўзбекистондаги БМТ Тараққиёт дастури вакиллиги ҳамкорлигида ташкил қилинган. Унга биноан, 5 та ҳудуд, яъни Жиззах, Қашқадарё, Сирдарё, Сурхондарё ҳамда Тошкент вилоятларида юқори стандартлар асосида давлат хизматларини кўрсатиш йўлга қўйилган.
БМТ Тараққиёт дастурининг Ўзбекистондаги Доимий вакили Матилда Димовсканинг таъкидлашича, давлат хизматларидан фойдаланиш имкониятларини яхшилаш ҳар бир ҳукумат учун ўз фуқароларига янада самарали хизмат кўрсатишни истайдиган муҳим элемент ҳисобланади.
Давлат хизматларининг такомиллашуви қишлоқдаги аҳолининг заиф қатламлари ҳаёт сифатини яхшилаш, уларнинг хизматлардан фойдаланиш имкониятларини кенгайтиришга қаратилган, дейилади маълумотда.
