Ўзбекистон терма жамоаси кетма-кет иккинчи марта Жаҳон Чемпионатининг 2-саралаш босқичини мағлубият билан бошлади. Фаластин билан ўйиндаги мағлубият ва Ироққа қарши ўртоқлик баҳсидаги нурсиз дуранг сабаб терма жамоа бош мураббийи Эктор Купер лавозимидан олиниши ҳақида гап-сўзлар болалаб кетди. Ва ҳатто 11 сентябрь куни маҳаллий нашрлардан бири «Бунёдкор» устози Вадим Абрамовнинг мамлакат бош жамоаси бошқарувига келиши ҳақида ёзиб чиқди. «Дарё» эса мазкур воқеликларни бир саҳифага жойлашга ҳаракат қилди.
6 сентябрь, жума
Ўзбекистон 5 сентябрь куни Фаластинга қарши баҳсда нурсиз ўйин кўрсатди ва 0:2 ҳисобида мағлуб бўлди. Орадан бир кун ўтиб, вақтида мамлакат футболида фаолият олиб борган, айни дамда эса Қатарда ишлаётган таниқли футбол эксперти Алишер Никимбаев терма жамоа ва Купер ҳақида ёзиб чиқди: «Агарда Куперни истеъфога чиқариш қарори қабул қилинса, бунга пул керак бўлади. Бунинг устига янги мураббий жалб қилиш учун ҳам маблағ талаб қилинади. Билишимча, бунинг учун ЎФАда пул йўқ. Аввалги раҳбарият жуда дабдабали ҳаёт кечирган ва нафақат Мираброр Усмонов давридан қолган (айрим маълумотларга кўра 2 миллион доллар атрофида) пуллар, балки сўнгги икки йил ичида ЎФА ҳисобига тушган бошқа маблағларни ҳам ишлатиб юборган».11 сентябрь, чоршанба
Бир муддат аввал ўз фаолиятини бошлаган «Togri.uz» интернет-нашри 11 сентябрь куни «Вадим Абрамов терма жамоага қайтиши мумкин» сарлавҳали хабар билан чиқиш қилди.Хабарда айтилишча, «Бунёдкор» клубининг шахси очиқланмаган вакили ЎФА раҳбарияти Эктор Куперни лавозимидан озод қилиб, унинг ўрнига Вадим Абрамовни олиб келиш фикрида эканлигини маълум қилган. Клуб вакили ҳам худди Никимбаев сингари Купернинг маоши катта эканлиги, агар у ишдан кетган тақдир мураббийга катта миқдорда товон пули тўланиши кераклигини таъкидлаган. Бундан ташқари, манба «Бунёдкор» Абрамовни жамоада қолишни исташини, агар у терма жамоага ўтган тақдирда ҳам параллел равишда иш олиб бориши мумкинлиги ҳақида айтган. Шу билан бирга вакил Абрамов борасида «Бунёдкор»га расмий таклиф тушмаганини билдирган.
Ўз ўрнида нашр Вадим Абрамовнинг ўзига алоқага чиққан. Аммо мураббийнинг ўзи бу гаплардан бехабар эканлигини маълум қилган.
12 сентябрь, пайшанба
«Дарё» нашри воқеликларга Ўзбекистон футбол ассоциациянинг муносабатини билиш мақсадида ташкилотнинг матбуот ва медиа департаменти директори Даврон Файзиев билан боғланди. Унинг сўзларига кўра, Вадим Абрамовнинг терма жамоа бошқарувига келиши ҳақида маълумотлар ҳақиқатдан йироқ. Шунингдек, Купернинг истеъфоси ҳақида ҳам ҳали ҳеч қандай гап-сўз йўқ. «Буларнинг ҳаммаси шунчаки гап-сўз», — дейди Файзиев. У, шунингдек, Эктор Купернинг сўнгги ўйинлардаги иши тез орада ўрганиб чиқилиб, муҳокама қилиши мумкинлигини қўшимча қилди.Бундан ташқари, ЎФА биринчи вице-президенти Равшан Эрматов бошқа бир маҳаллий ОАВга Эктор Купернинг терма жамоа рулидан кетмаслигини маълум қилган.
Абрамовдан бошқа номзод борми?
Йўқ. Қайд этиш жоиз, айланаётган гап-сўзлардан Купер ўрнига фақатгина Вадим Абрамовнинг келиши мумкинлиги айтилмоқда. Фаластиндан қабул қилинган мағлубиятдан сўнг аргентиналик мутахассис қуйидагича чиқиш қилди:
«Саралашда энди биттагина ўйин ўтказдик, холос. Битта ўйиндан кейин истеъфо ҳақида гапириш жуда ҳам ноўрин, деб ҳисоблайман».Эслатиб ўтамиз, Эктор Купер Ўзбекистон термасига мураббий бўлишидан олдин у билан бир вақтда Златко Далич, Карлуш Кейруш ва Темур Кападзе каби мутахассислар мамлакат бош жамоаси устозлигига номзод сифатида кўрсатилганди.
Мавзуга доир: Эктор Купернинг Ўзбекистондаги сафари ҳам қариди(ми?)
Маълумотнома
Ушбу воқеликлар фонида Вадим Абрамовнинг Ўзбекистон миллий терма жамоадаги фаолиятига назар солиб ўтамиз.Абрамов 2010 йил апрелида Ўзбекистон терма жамоаси бош мураббийига айланади. Унгача мутахассис Тошкентнинг «Локомотив» клубини бошқариб келаётган эди. Унинг олдига 2011 йил январида бўлиб ўтадиган Осиё Кубогида муваффақиятли иштирок этиш вазифаси қўйилади. Абрамовнинг Осиё Кубогидаги натижаси эса кўпчиликка маъқул келди. Ўзбекистон ўз тарихида илк бор мусобақа ярим финалига қадар етиб борди.
Ўзбекистон терма жамоасининг Абрамов қўл остида 2011 йилги Осиё Кубогида қайд этган натижалари
Гуруҳ босқичи- Қатар — Ўзбекистон 0:2
- Кувайт — Ўзбекистон 1:2
- Хитой — Ўзбекистон 2:2
- Ўзбекистон — Иордания 2:1
- Ўзбекистон — Австралия 0:6
- Жанубий Корея — Ўзбекистон 3:2
Ўзбекистон терма жамоасининг Абрамов қўл остида 2014 йилги Жаҳон Чемпионати учун саралаш баҳсларида қайд этган натижалари:
ЖЧ—2014 2-саралаш босқичи- Ўзбекистон—Қирғизистон 4:0 (3:0)
- Тожикистон — Ўзбекистон 0:1
- Ўзбекистон — Япония 1:1
- КХДР — Ўзбекистон 0:1
- Ўзбекистон — КХДР 1:0
- Ўзбекистон — Тожикистон 3:0
- Япония — Ўзбекистон 0:1
- Ўзбекистон — Эрон 0:1
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)