АҚШ президенти Дональд Трамп Миллий хавфсизлик кенгашининг ёпиқ брифингларида бир неча бор бўронларга қарши курашишда ядровий бомбалардан фойдаланишни таклиф қилган. Бу ҳақда шу турдаги йиғилишларда иштирок этган манбага таяниб, «ТАСС» хабар берди.

Бўронларга бағишланган брифинглардан бирида Трамп нега табиий офатга ядровий зарба бериб бўлмаслиги билан қизиққан, «Бўронлар Африка қирғоқларида шаклланиб, Атлантика орқали ҳаракатланмоқда, биз унинг қоқ марказига зарба бериб, бўронни тарқатиб юборамиз. Нега бундай қила олмаймиз?», — деган президент.

Йиғилиш иштирокчиларидан бири Оқ уй раҳбарининг фикрини қўллаб-қувватлаган: «Жаноб, биз буни кўриб чиқамиз». Қолган иштирокчилар эса президентнинг таклифидан хайратга тушган.

Ушбу маълумотга Оқ уй қуйидагича изоҳ берган: «Биз президентнинг миллий хавфсизлик бўйича жамоаси билан ўтказган ёки ўтказмаган шахсий мулоқотларига изоҳ бермаймиз». Таъкидлашича, президентнинг ғояси амалга ошмаган.