Сурхондарёлик уч ёшли қизалоқнинг операциядан кейинги аҳволи ижтимоий тармоқларда кенг муҳокама қилинди. Юракларни ларзага келтирган она ноласи ва қизалоқнинг бугунги ҳолати акс этган видеони охиригача кўришга бардоши етмаганлар ҳам кўп бўлди.
Шаҳризода Менгқобилова 2016 йилда Қизириқ туманида туғилган. Қизалоқ туғма юрак пароги билан дунёга келган, бунга қўшимча равишда бўйнида ҳам нуқсони бўлган. Шаҳризоданинг онаси Гулноза Нурманованинг айтишича, врачлар: «Қизингда юрак пароги бор, операция билан яхши бўлади», — деган.
— Операциягача қизим яхши ривожланди, фақат айрим вақтлари бармоқлари кўкариб қолар ва тез чарчаб қолар эди, — дейди Гулноза Нурманова. — Уч ярим ёшда кўкариш ва тез чарчашлари йўқолар деб операция қилдиришга қарор қилдик. Воҳидов номидаги республика жарроҳлик маркази ҳам, Тошкент педиатрия тиббиёт институти клиникаси шифокорлари ҳам операция қилишга рози бўлмади. Операцияга маблағимиз йўқлиги туфайли «Соғлом авлод» фондига мурожаат қилгандик, улар рўйхатга қўйган эди. «Соғлом авлод» фонди биз учун Тошкент шаҳридаги «Эра мед» хусусий килиникасига 24 миллионга яқин пул ўтказиб берган экан. Клиника врачи Бобур Солиев бир неча марта телефон қилиб бизни чақирди. Биз 8 майда «Эра мед»га бордик, бир ҳафта мобайнида анализ олди, таҳлил жавоблари яхши чиқди ва: «Қизинг операцияга ярайди», деди.
Қизалоқ 16 май куни операция қилинган, сўнг бир ҳафта давомида реанимацияда ётган.
— Бир ҳафтадан кейин боламни кўрганимда, у таниб бўлмас ҳолатда эди. Ўшанда қизимнинг аҳволи жуда оғир эди, ҳамма тарафи шишган, пешоб қилолмасди. Буни врачларга айтганимда: «Буйраги «отказ» қиляпти, яна реанимацияга оламиз», деди. Сўнг қизимни наркозсиз тўртта жойидан тешиб кўришган, кучли оғриқдан қизим нафас ололмай қолган. Лор врач келиб бўйнига трубка қўйгунча 3 соат нафас ололмай қийналган. Шундан кейин боламнинг кўзлари кўр, оёқ-қўллари ишламай қолган, — дейди Гулноза Нурманова.
Шифокорлар боланинг бу оғир аҳволини вақтинчалик, ҳали яхши бўлиб кетади деб овутган.
— Лекин яхши бўлмади. Клиника врачи: «Боланг қўрқди, мулла олиб келиб ўқит», деди. Клиника реанимациясида икки ой ётдик, аҳволи тобора оғирлашди. Шундан сўнг: «Энди болангни невропатологлар даволайди», деб бизни Сурхондарёдаги вилоят кўп тармоқли болалар шифохонасига самолёт билан ўзлари қўйиб кетишди, — дейди Гулноза Нурманова.
Қизалоқнинг аҳволи кун сайин оғирлашмоқда. Она қаерга боришини, кимга мурожаат қилишини билмай ҳалак.
— Балки чет элда даволаш мумкиндир, — дейди Гулноза Нурманова. — Ҳар бир ўтаётган кун боламни ҳаётдан узоқлаштираётгандай... Қизимнинг орзулари кўп эди, операциядан кейин қўллари кўкармай чиройли бўлишини, келин бўлишни орзу қиларди... Яхши одамлар кўплигига ишонаман, клиника шифокорлари ҳам буни атай қилмаганини тушунаман. Фақат менга ёрдам беринглар, илтимос. Ҳар қандай ёрдамга эҳтиёжим баланд ҳозир.
- Телефон рақами: +998-99 376-38-39 Нурманова Гулноза (Шаҳризоданинг онаси)
- Пластик-карта рақами: 8600 0602 2014 1338
Изоҳ (0)