Ўзбекистон элчилари ЖИДУ битирувчиларининг энг аъло ишларини тақдирлади
2019 йилнинг 15 август куни Ўзбекистон Республикаси Ташқи ишлар вазирлигида Жаҳон иқтисодиёти ва дипломатия университети битирувчилари ўртасида ўтказилган энг яхши диплом ишлари танлови ғолибларини тақдирлаш маросими ўтказилди. Бу ҳақда ТИВ матбуот хизмати хабар бермоқда.
Танлов якунига кўра, Ўзбекистон Республикасининг Австрия Республикасидаги фавқулодда ва мухтор элчиси Шерзод Асадов, Ўзбекистон Республикасининг Россия Федерациясидаги фавқулодда ва мухтор элчиси Ботиржон Асадов ва Ўзбекистон Республикасининг Франция Республикасидаги фавқулодда ва мухтор элчиси Сардор Рустамбаев ЖИДУ «Халқаро муносабатлар» факультетининг 2019 йилги битирувчилари Улуғбек Абдусаломов, Екатерина Куртова ва Моҳира Зайниддиновани сертификат ва эсдалик совғалари билан тақдирлади.
Танлов Ташқи ишлар вазирлигининг Таълим муассасалари фаолиятини мувофиқлаштириш бўлими томонидан эълон қилиниб, Ўзбекистоннинг Австрия, Франция ва Россиядаги дипломатик ваколатхоналари кўмагида ўтказилди.
Бўлимга университет талабаларининг кўплаб битирув ишлари келиб тушди ва улар ташқи сиёсат идораси тизимида катта иш малакасига эга дипломатлар томонидан ўрганиб чиқилди.
Таълим муассасалари фаолиятини мувофиқлаштириш бўлими Ўзбекистоннинг хориждаги дипломатик ваколатхоналари билан ҳамкорликда танловни ҳар йили ўтказишга қарор қилди.
