Янги Альба? «Барселона»нинг янги футболчиси Хуниор Фирпо ҳақида 5 та факт

Бутун ёз бўйи испан ОАВлари тилидан тушмаган Хуниор Фирпо аслида ким? Нима учун доминканлик 22 ёшли футболчи учун «Барселона» 18 миллион евро (яна 12 миллон евро бонус ҳам бор) тўлади?

Фирпо — чап қанот ҳимоячиси. Кўпчилик унинг Хорди Альбага ўринбосар бўлишига ишонмоқда. 22 ёшли футболчи ўтган мавсумда «Бетис»га Испания Кубогида ярим финалга чиқишда ҳамда Ла Лигада 10-ўринни эгаллашда ёрдам берди. У ўтган мавсум 24 бора майдонга тушди ва асосон чап қанотда ҳаракат қилди. Ҳимоячи бўлишига қарамай ўз жарима майдончасида хавф кам бўлган ҳолларда ҳужумга чиқишни ёқтиради. «Барселона» мухлислари Фирпони аллақачон «кўк анорранглилар» учун яратилганига ишонмоқда. Бироқ Хуниорнинг ўзи мухлисларни ҳақиқатда ҳам адашмаганликларини исботлаши учун кўп тер тўкишига тўғри келади. Қуйида Фирпога оид кўпчиликка номаълум фактлар билан танишиб чиқишни тавсия қиламиз:

1-факт. Фирпо фаолиятини вингер сифатида бошлаган

Чап қанот ҳимоясида ҳаракат қиладиган футболчиларнинг кўпчилигида айнан шундай ҳолат кузатилган. Аввал ярим ҳимоя чизиғи қанотида тўп суради. Кейинчалик эса ҳимояга ўтказилади. Фирпо шу жиҳатдан Марсело ва Аарон Уан-Биссакага ўхшаб кетади. Хуниор фаолиятини ярим ҳимояда бошлаган. Фаолияти аввалида «Атлетико Бенамьел», «Тиро Пичон» ва «Пуэрто Малагено» клубларида ҳам вингер сифатида тўп сурган. Фақатгина «Бетис»га келиб, у амплуасини алмаштирди. Ва бу ҳолат унда омадли кечди. Энг асосийси, у ўз тезлигини йўқотмади.

2-факт. Фирпо ҳам «Бетис» ҳам «Барселона»да тўп сурадиган 25-футболчи

«Бетис» ва «Барселона» трансфер борасида анчадан бери дўстона алоқага эга. Иккала клуб сафида ҳаракат қилган футболчилар сони Фирпога қадар 24 нафар эди. Бу рўйхатдан Марк Бартра, Кристиан Телио, Мартино Монтоя ва Серхио Гарсия каби таниқли ўйинчилар ҳам ўрин олган.

3-факт. Фирпо Доминикан республикасида туғилганига қарамай, Испаниянинг ёшлар терма жамоасида ўйнаб улгурган

Фирпо Италия мезбонлик қилган ёшлар ўртасида Европа чемпионатида Испания терма жамоаси билан чемпионга айланди.

У — Испания фуқароси. 6 ёшида мамлакатга кўчиб келган. Аммо футболчи Доминикан терма жамоасида сафида 2015 йил Бразилия ёшларига қарши майдонга тушган. Шунга қарамай футболчи катталар ўртасида қайси терма жамоа шарафини ҳимоя қилиш борасида бир қарорга келмаган.

4-факт. Фирпо — «Барселона» сафидаги илк доминиканлик футболчи

Фирпо «Бетис»га келган вақтда Ла Лигадаги илк доминиканлик футболчи сифатида тарихга кирганди. Ва албатта бу миллат жиҳатидан эмас, балки туғилган жойи назарда тутилаётгани диққатга сазовор. Унга қадар Ла Лигада Ҳайнц Барметтлер, Тано Боннин ҳамда Мариано Диас («Реал» ҳужумчиси) ҳам ўйнашга улгурганди. Бироқ уларнинг ҳеч бири Доминиканда туғилмаганди. Табиийки, Фирпо шу тариқа «Барселона»нинг илк доминиканлик ўйинчисига айланди.

5-факт. Фирпонинг футболдан кетишига бир баҳя қолган

Фирпо кўп вақтини Испаниянинг қуйи дивизионида ўтказганлиги учун ҳам кўпчилик бундай ўйинчи борлигидан ҳам бехабар бўлган. Футболчи Marca’га берган интервьюсида унинг ёшидаги кўплаб ўйинчилар катта-катта жамоаларда ўйнаётгани ва телевидениеда ҳам тез-тез кўриниш бериши ҳақида бежиз айтмаган эди. Фирпо ҳатто «Бетис» 2015 йил ёзида у билан шартнома имзоламаганида футболчилик фаолиятига якун ясашга тайёр бўлганлигини таъкидлаган.