Эмомали Раҳмон ва Сооронбай Жеенбеков икки давлат чегарасида учрашди
Қирғизистон президенти Сооронбай Жеенбеков ва Тожикистон президенти Эмомали Раҳмон қирғиз-тожик чегарасида учрашди. Бу ҳақда Sputnik хабар берди.
Хабарда таъкидланишича, икки давлат раҳбари чегара ҳудудидаги аҳоли билан қўшма учрашув ўтказган.
Маҳаллий аҳоли билан учрашувда икки давлат раҳбарлари тинчлик ва тотувлик, халқлар ўртасидаги кўп асрлик дўстликни сақлаш муҳимлигини қайд этди. Шунингдек, чегарадаги мавжуд бўлган барча муаммоларни бартараф этиш учун чора кўришга тайёр эканини таъкидлади.
Маълум қилинишича, икки давлат етакчилари музокараларни давом эттириш учун Тожикистон Республикасининг Исфара шаҳрига йўл олган.
Эслатиб ўтамиз, 22 июль куни Тожикистон ва Қирғизистон чегарасида навбатдаги қуролли можаро юз берди. Қирғизистон давлат чегара хизмати маълумотига кўра, Тожикистон Ворух қишлоғи аҳолиси аҳоли пунктига кириш жойига байроқ ўрнатмоқчи бўлган, Оқ-Сой (Қирғизистон) қишлоғи аҳли эса бунга қарши чиққан. Оғзаки тортишув давомида томонлардан бири қурол ишлатган. Отишма оқибатида бир нафар тожикистонлик ўқитувчи ҳалок бўлди, 16 киши жароҳатланди, бир нафар милиция ходими оғир аҳволда.
Кейинчалик Тожикистон чегара хизмати ушбу воқеани Тожикистон раҳбари Эмомали Раҳмон ва Қирғизистон раҳбари Сооранбай Жеенбековнинг учрашуви арафасида уюштирилган иғво деб атади.
