Қирғизистон ва Тожикистон чегарасида 22 июль, душанба куни қуролли можаро юз берди. Бу ҳақда Қирғизистон чегара хизмати маълум қилди, дея хабар беради «ТАСС».
«Можарога Ворух (Тожикистон) қишлоғи аҳолиси томонидан мазкур аҳоли пунктига киришда байроқ ўрнатилгани сабаб бўлган. Оқсой (Қирғизистон) қишлоғида яшовчилар бунга қарши чиққан ва ўртада тортишув юзага келган. Томонлардан бири қурол қўллаган. Отишмада фуқаролар ов қуролидан фойдаланган», — дейилади хабарда.
Қирғиз томонига кўра, ҳодиса оқибатида 5 киши яраланган. Исфара—Ворух автотрассаси ёпиб қўйилган.
Тожикистоннинг Қирғизистон билан чегарадаги Исфара шаҳри маъмуриятининг сўзларига кўра, можаро туфайли тожик фуқароси — 52 яшар маҳаллий ўқитувчи ҳалок бўлган, 15 киши жабрланган.
Фавқулодда ҳолат жойига икки давлат чегара хизмати, ҳокимият ва ҳуқуқ-тартибот идоралари вакиллари етиб келгани билдирилмоқда.
Изоҳ (0)