Инновацион ривожланиш вазирлиги ва БМТ Тараққиёт дастури томонидан ташкил этилган Инновациялар ва бошқарув ечимлари лабораториясида «Туртки бериш назариясининг давлат секторида қўлланилиши» мавзусида давра суҳбати ўтказилди. Бу ҳақда «Дарё»га вазирлик матбуот хизмати маълум қилди.
Тадбирда фан доктори, профессор, Ўзбекистоннинг Буюк Британиядаги собиқ элчиси Алишер Файзуллаев маъруза билан чиқиш қилди. Давра суҳбати иштирокчилари — қатор вазирликлар ва давлат идоралари вакиллари туртки бериш назариясини қўллаган ҳолда ечилиши мумкин бўлган муаммоларни аниқлаштиришга уринди, шу билан бир қаторда, назарияни қўллаш усулларини муҳокама қилди.
Туртки бериш назарияси алоҳида шахслар, гуруҳлар ва ташкилотлар томонидан қарорларнинг қабул қилинишига тўғридан-тўғри бўлмаган, «юмшоқ» кўрсатмалар орқали таъсир кўрсатиш усулини ўрганади. Мазкур назария бўйича тадқиқотлар Ўзбекистонда Алишер Файзуллаев бошчилигида олиб борилмоқда. Шу йўналишдаги тадқиқотнинг асосий мақсади мазкур назариянинг тамойилларини амалда синаб кўриш орқали жамиятни қийнаб турган аниқ муаммоларининг ечилишида туртки бериш назариясининг имкониятларини намойиш этишдир.
Ўз навбатида, Инновациялар ва бошқарув ечимлари лабораториясида давлат идоралари ва муассасалари вакилларининг тадқиқот объектини аниқлаш бўйича фикр-мулоҳазалари тингланиб, умумлаштирилмоқда.
Бу назария америкалик иқтисодчи Ричард Талер ва ҳуқуқшунос Касс Санстейннинг 2008 йили чоп этилган «Соғлиғимиз, фаровонлигимиз ва бахтимиз борасидаги қарорларимизни қандай мукаммаллаштирамиз» китобидан сўнг оммалашди. У, шунингдек, АҚШ ва Буюк Британия тадбиркорлик ва соғлиқни сақлаш масалалари билан шуғулланадиган сиёсатчилари томонидан қўллаб-қувватланди.
Таъкидлаш жоизки, Р. Талер аввалги тадқиқотларни умумлаштириб, назария яратгани учун иқтисод бўйича Нобель мукофотга сазовор бўлди.
Назариянинг аҳамиятли жиҳати шундаки, у бирор ҳолатни тақиқламайди, аксинча, жамият учун фойдали нарсани тарғиб қилади. Мактаб ошхонаси пештахтасида болалар саломатлиги учун фойдали бўлган мевалар, сабзавотли салатлар, сут-қатиқ маҳсулотларни уларнинг кўзлари энг тушадиган жойга жойлаштириш туртки бериш дейилади, газли ширин ичимликлар, қовурилган қарсилдоқ картошка, дудланган колбаса каби зарарли маҳсулотларни таъқиқлаш эса туртки бериш саналмайди. Болаларда танлаш имконияти бўлгани ҳолда, уларни фойдали таомларни истеъмол қилишга ўзларига сездирмаган ҳолда ундаб турилади.
Изоҳ (0)