«Дизайн» аъзоси Дилшодбек Мусабеков концертдан бир кун аввал отаси вафот этгани ҳақида йиғлаб гапирди (видео)

«Дизайн» жамоаси аъзоси Дилшодбек Мусабеков «Дарё» интернет-нашри учун эксклюзив интервю берди. Интервюни журналист Феруз Муҳаммад ташкиллаштирди.

Суҳбат давомида Дилшодбек Мусабеков концерт дастуридан бир кун олдин отасининг вафот этгани, «Дизайн» жамоаси аъзолари бир оила бўлиб унинг ёнида тургани  ҳақида гапириб берди.

Дадамни қабрга қўйганимизнинг эртаси куни концерт бўлиши керак эди. Ўша куни йигитлар ёнимда келиб, ‘Ака, сиз нима десангиз шу бўлади’, дейишди. Саъдулла маҳкам қучоқлаб, ‘Бардам бўлинғ деди, Абдураҳмон ҳам, Қобил ҳам ‘Биз сиз билан’ деб қайғумга шерик бўлди.  Бу мен учун катта далда бўлди. Сездимки, болалар чўкиб қолишган эди.

Бизнинг жамоада шундайки, бир-биримизнинг хонадонимизга борсак, масалан улар меникига келишса, дадамни ‘амаки’ дейишади. Лекин ҳаммамиз оналаримизни ‘онажон’ деб кўришамиз. Улар менинг онам билан ‘онажон’ деб, мен уларникига борсам ‘онажон’ деб кўришамиз. Оилаларимиз бир-бирига чамбарчас боғланиб кетган.

Ҳар куни уйга келганимда дадам: ‘Ўғлим, мана аста-секин кўзга кўриниб боряпсилар, ҳаммаси яхши бўлиб кетади. Фақат бир илтимос, такаббурликдан эҳтиёт бўлинглар, кибрга берилманг. Уйингдан қандай муаммо билан чиқиб кетсанг ҳам, кўчадагиларга буни кўрсатма!’, дердилар.

Дилшодбек Мусабеков, «Дизайн» жамоаси аъзоси