Ўзбекистон ва Қозоғистон ўртасида халқаро автомагистрал очилди
Ўзбекистон Бош вазири Абдулла Арипов бошчилигидаги делегация «Бейнеу — Акжигит — Ўзбекистон чегараси» халқаро автомагистралининг тантанали очилиш маросимида иштирок этди. Бу ҳақда ЎзА хабар бермоқда.
Икки мамлакат ҳукуматлари раҳбарлари бошчилигидаги делегация, қурувчи-мутахассислар, кенг жамоатчилик ва оммавий ахборот воситалари ходимлари қатнашган тадбирда мазкур халқаро аҳамиятга молик йўлнинг қайта таъмирланиб, фойдаланишга топширилиши мамлакатларнинг қардошлик ва яхши қўшничилик муносабатлари тобора мустаҳкамланиб бораётганидан далолат экани таъкидланди.
Автомобиль йўлининг узунлиги 84 километрни ташкил этади. Мазкур йўлни реконструксия қилиш ва уни Қорақалпоғистоннинг Устюрт платоси орқали ўтувчи халқаро автомобиль йўл билан туташтириш учун 108 миллион АҚШ долларлик маблағ йўналтирилди.
«Бейнеу—Акжигит—Ўзбекистон чегараси» автомагистрали мамлакатларнинг иқтисодиёти юксалиши ва ўзаро товар айирбошлаш ҳажмининг ортишига хизмат қилади. Ўзбекистоннинг Қозоғистон орқали шимолий ва шимоли-ғарбий йўналишлар — Болтиқбўйи ва Европа мамлакатларига чиқишда, шунингдек, денгиз бўйи мамлакатлари билан боғланишида муҳим аҳамият касб этади.
