Бандлик ва меҳнат муносабатлари вазирлиги аҳоли бандлигини таъминлашнинг замонавий механизмларини амалиётга жорий қилишда қатор янги лойиҳаларни ишга туширмоқда.
Шулардан бири «Сабр» Республика ижтимоий-иқтисодий ривожланиш маркази билан ҳамкорликда амалга оширилиши режалаштирилган «Ўзбекистон Республикасининг Андижон, Жиззах, Навоий, Самарқанд ва Сурхондарё вилоятларидаги қишлоқ худудларида ижтимоий муаммоларни ҳал қилиш ҳамда кам таъминланган аҳоли, айниқса, ёшлар ва хотин-қизлар бандлигини таъминлаш ва янги иш ўринларини ташкил этишда ижтимоий ҳамкорликнинг инновацион механизмлари» лойиҳаси ҳисобланади.
Лойиҳа Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш Жамоат фонди томонидан ажратилган ижтимоий буюртма, Бандликка кўмаклашиш давлат жамғармаси ҳамда DVV Интерnationал Германия миллий университетлари уюшмаси маблағлари ҳисобидан амалга оширилади.
13 июль куни Бандлик ва меҳнат муносабатлари вазирлигида ишчи гуруҳ билан ушбу лойиҳа хусусида фикр алмашилди ва лойиҳа тақдимоти ўтказилди. Янги лойиҳа доирасида турли ижтимоий-демографик ҳолатга эга Андижон, Жиззах, Навоий, Самарқанд, Қашқадарё ва Сурхондарё вилоятларида Маҳаллий ривожланиш марказлари (МРМ)ни ташкил этиш, у ерда ишсиз фуқароларга касбий малака бериш ва шу орқали чекка ҳудудлардаги аҳоли, айниқса, кам таминланган оилалар, ёшлар ва аёлларни иш билан таъминлашга замин яратиш мақсад қилинган.
Шунингдек, лойиҳа доирасида:
меҳнат бозорида талаб юқори бўлган касблар йўналиши бўйича лойиҳа доирасидаги ҳар бир вилоят МРМида 6 тадан 8 тагача қисқа муддатли (2-3 ойлик) тайёрлов курсларини ташкил этиш;
МРМ битирувчиларига сертификат бериш ва уларга ўз тадбиркорлигини бошлаб янги иш жойларини ташкил қилишлари учун имтиёзли микроқарзлар ажратиш;
кам таъминланган оилаларнинг ижтимоий муаммоларини бартараф этиш учун МРМ ҳузурида психолог, тиббиёт ходими, юрист сингари мутахассислар маслаҳатини жорий қилиш;
давлат томонидан амалга оширилаётган ижтимоий-иқтисодий ислоҳотларни аҳоли ўртасида кенг тарғиб қилиш мақсадида «Фаол инсонлар клуби» ва «Ахборот-ресурс чойхонаси»ни ташкил этиш сингари чора-тадбирлар амалга оширилади.
Лойиҳа доирасида 1600 нафар шахс касбга ўқитилиши таъкидланди. Лойиҳа дастлаб белгиланган 6 та вилоятда тажриба сифатида амалга оширилгач, тўпланган ижобий тажриба ва инновацион ёндашув асосида республиканинг барча ҳудудларига тадбиқ этилади.
Изоҳ (0)