Бугун, 12 июль куни Олий Мажлис Сенати Мудофаа ва хавфсизлик масалалари қўмитасида Ички ишлар вазирлиги фаолиятининг 2019 йил биринчи ярим йиллигида амалга оширилган ишлари тўғрисидаги ҳисоботига бағишланган мажлиси бўлиб ўтди. Бу ҳақда «Дарё» мухбири хабар берди.
Тадбирда сенаторлар, қўмита раҳбарлари, ИИВ тизими вакиллари иштирокида соҳага оид бир қатор масалалар муҳокама қилинди. Жумладан, ИИВ вазири ўринбосари Рустам Хотамов сўнгги вақтларда кўпчиликни қизиқтирган боди-камералар ва йўллардаги назорат камералари юзасидан ҳам қисқача изоҳ бериб ўтди.
Ҳамиша йўлда юрамиз, бугун ижтимоий тармоқларда ҳам жуда катта масалалар кўтариляпти; камералар, бозорларнинг олдилари тартибга солиниши халқни қувонтиряпти, катта ўзгаришлар бўляпти, бу яхши. Ўзимиз ҳам кузатиб боряпмиз, хизматга ёш-ёш йигитлар келишяпти. Аммо ҳалигача йўл патруль хизмати ходимлари қоидабузарлар билан участка ёки бўлимга бормасдан гуруҳ-гуруҳ бўлиб муҳокама қилиб туришади. Бу масалани тартибга солишга, қонунларни ишлашига сенаторми, депутатми умуман олганда ҳеч биримиз бефарқ бўлмаслигимиз керак. Масалан, ўзим эрталаб ишга чиқиб кетаман. Қибрай йўлида гуруҳ-гуруҳ бўлиб туришганини кўраман. Албатта, камералар жорий этилиши ёрдам беради. Шу масалада ҳам тушунча берсангиз.Баҳодир Тожиев, Сенатнинг аграр, сув хўжалиги масалалари ва экология қўмитаси раиси
Жорий йилнинг 1 июлидан бошлаб жорий этилиши лозим бўлган боди-камералар жойлашуви бўйича қароримиз техник сабабларга кўра 2020 йилнинг январь ойига қадар суриляпти. Шу билан биргаликда, сиз тилга олган ходимларнинг дислокация масаласига ўтадиган бўлсак, ҳар кунги йўриқномада ходимларнинг қаерда хизмат ўташлари белгиланади ва бу Йўл ҳаракати хавфсизлиги бошқармаси томонидан назоратга олинади. Лекин вазиятдан келиб чиқиб қайси жойларда йўл танқислиги бўлиб қолса ёки йўлларда ҳаракатланиш муаммолари юзага келган тақдирда, уларнинг йўналишлари, албатта, ўзгартириб борилади. Барча ҳудудларда кузатув камераларини қўйиш масаласи илгари сурилган. Бунинг натижасида ЙҲХ ҳамда йўл-патруль хизмати ходимларининг иштироки кескин камаяди, лекин бирданига эмас. Чунки ҳамма тизим жорий этилгани йўқ, секин-секин мақсадга эришиб борилади. Яна бир нарсани қўшимча қилиб айтмоқчиманки, Ички ишлар органлари тизимида Кадрлар Бош бошқармаси, ўзининг хавфсизлик хизмати тизимлари борки, булар билан доимий равишда йўл-патруль хизмати, профилактика инспекторлари, бошқа соҳавий хизмат ходимлари устидан назорат олиб борамиз. Профилактик тадбирларимиз ва тарбиявий ишларимиз натижасида ИИВнинг таъмаргирликка қарши кураш бўйича чоралари туфайли ўтган йилнинг шу даврига нисбатан, ходимлар томонидан амалга оширилган жиноятлар сони 2 бараварга камайишига эришилди. Айни ишлар келгусида янада кучайтирилади.Рустам Хотамов, Ички ишлар вазири ўринбосари
Изоҳ (0)