Самарқандда «Умарбой» ва унинг шериклари 188 кишини 45 млрд сўмга чув туширганликда айбланмоқда

Халқ орасида «Умарбой» номи билан танилган Олим Ражабов ва унинг шериклари устидан суд иши бугунги кунда жиноят ишлари бўйича Самарқанд шаҳар суди томонидан кўриб чиқилмоқда.

Жиноят ишлари бўйича вилоят суди раисининг ўринбосари Ўткир Мамадалиевнинг билдиришича, Олим Ражабов ва унинг шериклари Жиноят кодексининг 168-моддаси тегишли бандлари билан 188 нафар жабрланувчининг жами 44 миллиард 647 миллион 929,4 минг сўмлик, шу жумладан, 726 минг 850 долларлик пул маблағларини фирибгарлик йўли билан талон-тарож қилишда айбланмоқда.

Шунингдек, Жиноят Кодексининг яна бир қанча модда ва бандларига биноан «Умарбой» 29 миллиард 830 миллион 649,3 минг сўмлик пул маблағини жамиятга хизмат кўрсатувчи банк муассасаларига топширмасдан, кирим қилмасдан савдо ва хизмат кўрсатиш қоидаларини жуда кўп бор бузишда, муайян мажбуриятдан озод этадиган, жамият ва харидорлар ўртасида расмийлаштирилган далолатномаларини такроран қалбакилаштиришда, далолатномалар қалбаки эканини била туриб, улардан такроран фойдаланишда, 15 миллиард 978 миллион 31,3 минг сўмлик мол-мулкларни легаллаштиришда айбланиб судга берилган.

Мазкур жиноят иши ҳозирги кунда суднинг иш юритувида бўлиб, навбатдаги суд мажлиси 15 июль куни давом этади.