Хабарингиз бор, шу йилнинг 7 июль куни ижтимоий тармоқларда Сурхондарё вилоятининг Денов туманидаги бозор ҳожатхонасига ташлаб кетилган янги туғилган чақалоқ топиб олингани ҳақидаги видео тарқалган эди. Ҳолатга ойдинлик киритиш мақсадида, Ўзбекистон Республикаси Ички ишлар вазирлигига мурожаат қилдик. ЎзА маълум қилишича, ушбу ҳодиса жорий йилнинг 2 июль соат 15:00 ларда содир бўлган. Сурхондарё вилоятининг Денов туманидаги «Лолазор» маҳалласида жойлашган «Ҳабибобод» бозоридаги аёллар ҳожатхонасида номаълум аёл чақалоқни туғиб ҳожатхона ташлаб кетган. Ундан кейин ҳожатхонага кирган аёл чақалоқ йиғисини эшитгач, профилактика инспекторига хабар берган. Кўрилган тезкор чоралар натижасида чақалоқ қутқариб қолиниб, касалхонага жойлаштирилган.
Олиб борилган қидирув ва суриштирув ишлари натижасида чақалоқнинг онаси, Сариосиё туманида яшовчи Ф.Т. эканлиги аниқланиб, айни вақтда ушланган ва Ф.Т.га нисбатан Ўзбекистон Республикаси Жиноят кодексининг 25 ва 99-моддалари билан жиноят иши қўзғатилган. Терговни прокуратура олиб бормоқда.
Ички ишлар вазирлиги маълум қилишича, капитан Якубов Акбар ҳеч нимадан тап тортмасдан, қўли билан чақалоқ баданининг бирор-бир жойига жароҳат етказмасдан ҳожатхонадан чиқариб олган. Маълумот ўрнида айтиш керакки, капитан Якубов Акбар айни дамда Денов тумани ИИО ФМБ 4-сон ички ишлар бўлими ҳуқуқбузарликлар профилактикаси гуруҳи ички ишлар органлари таянч пунктлари профилактика катта инспектори бўлиб ишлаб келмоқда.
Ҳозирги кунда ушбу чақалоқ Денов тумани марказий шифохонасига қарашли 2-сонли туғруқ бўлимида сақланмоқда ва унинг соғлиғи яхши.
Изоҳ (0)