Олий ва ўрта махсус таълим вазирлиги томонидан «Наманган давлат университети таркибида Ўзбекистон-Россия қўшма «Тиббиёт» факультетини ташкил этиш тўғрисида»ги қарор лойиҳаси жамоатчилик муҳокамасига тақдим этилди. Бу ҳақда Spot хабар беради.
Унга кўра, Наманган давлат университети таркибида Россиянинг Урал давлат тиббиёт университети билан ҳамкорликдаги Ўзбекистон-Россия қўшма «Тиббиёт» факультетини ташкил этиш таклиф этилмоқда.
Факультетда талабаларни ўқитиш тўлов-контракт асосида рус тилида, кундузги таълим шаклида Ўзбекистон Олий таълимининг давлат таълим стандартлари талаблари инобатга олинган ҳолда университетнинг Урал давлат тиббиёт университети билан қўшма таълим дастурлари асосида амалга оширилади.
2019−2020 ўқув йилидан бошлаб қабул квотаси Наманган вилоятидаги мавжуд талаб ва эҳтиёждан келиб чиқиб, университет ва Ҳамкор университет томонидан Олий ва ўрта махсус таълим вазирлиги билан келишилган ҳолда белгиланади.
Талабалар таълимнинг камида 2 йилини Урал давлат тиббиёт университетида ўқийди ҳамда мазкур даврда ўқиш билан боғлиқ харажатлар талабалар томонидан ўқитиш жойида тўланади.
Факультет битирувчиларига Ўзбекистон ҳамда Россияда олий таълим тўғрисидаги расмий давлат ҳужжати сифатида эътироф этилган, университет ҳамда Ҳамкор университет дипломлари берилади.
Лойиҳа ўзгартирилиши, унга қўшимча киритилиши ёки рад этилиши мумкин. 17 июлга қадар ҳавола орқали муҳокамада қатнашиб, ўз фикр ва мулоҳазаларини баён қилиш мумкин.
Изоҳ (0)