Самарқанддаги Университет хиёбонидаги жами 233 та дарахт инвентаризациядан ўтказилган. Бу ҳақда Самарқанд вилояти Экология ва атроф муҳитни муҳофаза қилиш бошқармаси матбуот хизмати «Дарё»га маълум қилди.
– Бугунги кунда 233 та дарахтнинг 139 таси рақамланиб табличкалар ўрнатилди. Табличкаларга дарахтнинг номи, ёши ва диаметри тўғрисида маълумот ёзиб қўйилди, — дейди матбуот хизмати раҳбари Санжар Садуллаев. – Қолган майда дарахт ва буталар ҳам инвентаризация қилинди. Бироқ улар ҳали ёш бўлганлиги учун рақамланмади. Қолган 94 дарахтга ҳам табличкалар тайёрланмоқда.
Маълумот учун, 1870 йилда қурилган 1400 метр узунликка эга бўлган хиёбоннинг 180 метрида аҳоли ва меҳмонларни маданий дам олишини мазмунли ташкил этиш мақсадида ободонлаштириш ишлари олиб борилмоқда.
Эслатиб ўтамиз, 18 июнь куни Самарқанд вилоят ҳокими Эркинжон Турдимов журналистлар билан учрашиб, Самарқанд шаҳридаги Университет хиёбонининг асл қиёфасини ўзгартирмаган ҳолда ободонлаштириш ишлари олиб борилишини, хиёбондаги ҳар бир дарахт алоҳида рақамланиб паспортлаштирилишини билдирган эди.
Изоҳ (0)