«Bravo’да хатоликлар бор эди». Миркомил Мусаев Bravo’нинг лицензияси олинган куни «Ўзбекконцерт»да бўлгани ҳақида гапирди (видео)

«Миллион» жамоасининг аъзоси Миркомил Мусаев «Дарё» интернет-нашри учун эксклюзив интервью берди. Интервьюни журналист Феруз Муҳаммад ташкиллаштирди.

Суҳбат давомида Миркомил Мусаев Bravo жамоасининг лицензияси олиб қўйилганига ўз муносабатини билдирди.

Биз Алишер Ботиров билан Bravo жамоасининг концертига борганмиз. Фақатгина концертда биринчи қаторда ўтирмадик. Сабаби вақт шуни тақозо қилар эди. У вақтлар Bravo  ва ‘Миллион’ жамоаси ўртасидаги муносабатлар жунбишга келган пайт эди.

Мухлислар томонидан саволлар ёғилиб келарди. Уларга ҳам, бизга ҳам ортиқча саволлар бўлмаслиги учун томошабинларга кўринмайдиган жойдан концерт дастурини томоша қилганмиз.

Концерт яхши ўтган. ‘Беайб парвардигор’ деганларидай хатоликлар бўлган. Ўзимнинг шахсий қарашларимни болаларга айтганман. Нима хатоликлар бўлганини фикримизни айтганмиз. Улар имкон даражасида бартараф қилишга ҳаракат қилишди. Аммо барибир хатоликлар бор эди. Бу билан ‘уларда хато бор, бизда йўқ’, демоқчимасман. Хатоликлар бизда ҳам бўлган. Иккига бўлинганимизнинг таъсири бўлган. Иш жараёнида вақт тиғизлиги бўйича улгура олмай қолишганми?! Ёки кўпроқ ёшлар билан ишлашганми, асосий мавзудан чиқиб кетилган.

Ҳозир маълум муддатга улардан лицензия олиб қўйилди. Лицензия олинган куни ‘Ўзбекконцерт’да бирга ўтирган эдик. Кулишиб ўтирдик, кулишиб хайрлашдик. Бу нарса уларга дарс бўлди.

Миркомил Мусаев, «Миллион» жамоасининг аъзоси