Инновацион ривожланиш вазирининг маслаҳатчиси Карстен Хайнц бошчилигидаги Ўзбекистон делегацияси Брюсселда «Европа ривожланиш кунлари» халқаро форумида иштирок этди.Бу ҳақда «Дарё»га вазирлик матбуот хизмати маълум қилди.
Европанинг мазкур нуфузли кенг қамровли тадбири мамлакатларнинг ривожланиш ва молиявий-техник ҳамкорлик масалаларига бағишланган бўлиб, ЕИ комиссияси томонидан 2006 йилдан бери ўтказиб келинади. Унда ҳар йили турли муассасалар ва Европа Иттифоқи мамлакатлари, донорлар, реципиентлар, халқаро ташкилотлар, шунингдек, хусусий сектор ва фуқаролик жамиятлари вакилларидан иборат 8 минг нафардан ортиқ иштирокчи қатнашди.
Мазкур форум доирасида Инновацион ривожланиш вазири маслаҳатчиси Карстен Хайнц Буюк Британиянинг собиқ бош вазири Тони Блэр билан учрашди. Британиялик сиёсатчи Европанинг кўплаб етакчи сиёсатчилари, жамоат арбоблари, халқаро ташкилотлар вакиллари қаторида халқаро форумида иштирок этиш учун келган.
Суҳбат чоғида томонлар Ўзбекистон ва Буюк Британия ўртасидаги инновацион ҳамкорликнинг бугунги ҳолати ва истиқболлари тўғрисида суҳбатлашди. Т. Блэр мамлакатда амалга оширилаётган ислоҳотлар ва ўзбек ҳамкорлар билан яқиндан алоқа боғлашга қизиқиш билдирди.
Ишчи ташриф доирасида Ўзбекистон делегацияси Брюссель савдо-саноат палатаси, Европа ташқи алоқалар хизмати, Европа Иттифоқининг Халқаро ҳамкорлик ва ривожланиш бўйича бош директорати ҳамда Тадқиқотлар ва инновациялар бош директорати масъуллари билан музокаралар олиб борди.
К. Хайнц Брюссель савдо-саноат палатасининг ижрочи директори Оливье Виллокка Ўзбекистонда илмий тадқиқотлар ва технологияларни ривожлантириш бўйича Европа Иттифоқининг икки томонлама дастурлари доирасида ҳамкорлик қилиш бўйича таклиф берди. Ўзбекистоннинг инновацион фаолияти билан яқиндан танишиш учун Виллок 2019 йилнинг 29—31 октябрь кунлари «Ўзэкспомарказ»да бўлиб ўтадиган InnoWeek инновацион ғоялар ҳафталигига таклиф этилди.
Изоҳ (0)