«Doing business with Namangan» халқаро инвестиция форуми якунига етди. Бу ҳақда «Дарё» мухбири Азизбек Абдувалиев хабар бермоқда.
Форумда 500 дан ортиқ меҳмон, жумладан, 36 давлат компания ва корхоналари вакиллари, мамлакатдаги дипломатик корпус ва хорижий ОАВ ходимлари, Ўзбекистоннинг 18 давлатдаги элчиси иштирок этди.
Наманган вилояти ҳокимининг биринчи ўринбосари Аюбхон Камоловнинг билдиришича, форум доирасида 50 дан ортик келишув ва шартнома имзоланди. Уларнинг умумий суммаси 350 миллион долларга яқин ва 20 та давлатни қамраб олади.
Жумладан, Ҳиндистоннинг Ultimate Investment компанияси билан ўтказилган музокаралар натижасида Наманганда уч ва тўрт юлдузли меҳмонхоналар қуриш бўйича 50 миллион долларлик битим имзоланди.
Хитойнинг Yantag Jimpeng Mining компанияси Поп туманида фойдали қазилмалар қазиб олиш бўйича 40 миллион долларлик лойиҳани амалга оширади.
Россиянинг «Тавиф савдо уйи» билан тўқимачилик маҳсулотлари экспорти бўйича 30 миллион долларлик келишувга эришилди.
Австриянинг АМЕ International ва AVK компаниялари 10 миллион доллар кредит жалб этган ҳолда вилоят кардиология маркази моддий-техник базасини такомиллаштиради.
Тадбир иштирокчилари вилоятдаги «Art Soft Tex», «Chortoq mineral water», «Ideal» каби йирик компаниялар фаолияти билан танишди.
Меҳмонлар Ахсикент археологик ёдгорлиги, «Chortoq resort» санаторий-соғломлаштириш маркази, Ибрат номидаги мажмуа, Наманган шаҳридаги яқинда анъанавий «Гуллар байрами» нишонланган Бобур номли боғда бўлди.
Изоҳ (0)