Қозоғистонда сайловга қарши намойишга чиққан ўнлаб кишилар ушланди (фото)

Қозоғистон пойтахти Нур-Султондаги митингда ўнлаб кишилар қўлга олинди, деб хабар беради «Vedomosti.ru». Намойишчилар бугун, 9 июнь куни Қозоғистонда бўлиб ўтаётган сайловни ноқонуний деб ҳисобламоқда.

Уларнинг фикрича, сайловолди кампаниясига ва номзодлар дастурлари билан танишишга кам вақт ажратилган. Одамлар «Шармандалик!», «Озодлик!» шиорларини баралла айтди.

Ҳуқуқ-тартибот органлари ходимлари намойишчиларни тарқатиб юбориш учун куч ишлатди.

Акция «Ёшлар» саройи қаршисидаги майдонда бўлиб ўтди.

Бир неча ўнлаб кишиларни полициячилар тутиб, мажбурлаб автобусларга миндириб юборди.