Тереза Мэй Британия Консерваторлар партияси етакчилигидан кетади
Тереза Мэй Буюк Британия Консерваторлар партия етакчилигидан кетади. «Эхо Москви»нинг ёзишича, шундан сўнг у мамлакат бош вазири лавозимини ҳам тарк этади.
Мей раҳбарлик лавозимларидан кетиши ҳақида 24 май куни маълум қилган эди. У шу йўл билан ҳукуматни Буюк Британияни Европа Иттифоқи таркибидан чиқариш билан боғлиқ муаммолардан халос этишга умид қилмоқда.
Даунинг-стритда чиқиш қилар экан, Мей Brexit тарафдорлари ғолиб бўлган 2016 йилги референдум натижаларини амалга ошириш учун барча имкониятларни ишга солганини, лекин бунинг уддасидан чиқа олмаганидан доим афсусланишини айтган.
Консерваторлар етакчилиги лавозимини тарк этгач, Мей партияга янги раҳбар тайинлангунга ҳукуматга вақтинча раҳбарлик қилади. Бу жараён 10 июндан бошланиб, июль ойи ўрталаригача давом этади.
Ҳозирда 11 нафар номзод сайловларда иштирок этиш истагини билдирган. Улар орасида Буюк Британия Ташқи ишлар вазирлигининг собиқ ва амалдаги раҳбарлари Борис Жонсон ва Жереми Хант, Brexit бўйича собиқ вазир Доминик Рааб, қироллик Ички ишлар вазирлиги раҳбари Сажид Жавид ҳам бор.
