25 май, Тошкент, «Халқлар дўстлиги». Битирувчиларни ўзбек эстрадаси юлдузлари ва МакSим қутлади (фото)

25 май куни Тошкентдаги «Халқлар дўстлиги» саройи битирувчи ёшлар билан гавжум бўлди. Бу ҳақда «Дарё»га Ёшлар медиа маркази маълум қилди.

«Менинг юртим» телеканали 2019 йил битирувчилари учун байрам концерт дастурини тайёрлади.

Унда миллий эстрада вакиллари Дилдора Ниёзова, Зоҳиршоҳ Жўраев, Равшан Собиров ва «Ситора» гуруҳи, Отабек Муталхўжаев, Жасур Умиров ва Жасур Мавлонов ўз чиқишларини тақдим этди.

Концертда Россия эстрадаси юлдузи МакSим ҳам жонли ижрода хит қўшиқларини куйлади.  Мухлислар эса унга жўр бўлди.

«Қайси қўшиқни ижро этишимни истайсизлар?» деган саволга жавобан залдагилар уни таклифларга кўмиб ташлади. «Тошкентда ҳатто ўзимнинг ҳам эсимдан чиққан қўшиқларимни биладиган мухлисларим бор экан» дея ҳайратини яширмади хонанда. У битирувчиларнинг ҳеч бир илтимосини ерда қолдирмади.

Ташкилотчиларнинг маълум қилишича, мазкур концерт дастури тез кунларда эфирга узатилиши режалаштирилган.