Сурхондарё вилоятида фаолият юритаётган Афғонистон фуқароларини ўқитиш таълим марказида ўзбек—афғон бизнес форуми ўтказилди. Бу ҳақда ЎзА хабар берди.
Форум доирасида дастлаб Термиз туманидаги «Термиз карго» экспорт марказида ташкил этилган «Ўзбекистон — Афғонистон» чегараолди савдо зонасининг тантанали очилиш маросими бўлиб ўтди.
Ўзбекистон ва Афғонистон давлат идоралари ҳамда хусусий сектор вакиллари иштирокидаги тадбирда икки қўшни мамлакат ўртасидаги ҳамкорлик алоқалари сўнгги йилларда янги босқичда ривожланаётгани таъкидланди. Чегараолди савдо зонаси ушбу алоқаларини янада мустаҳкамлайдиган ўзига хос дўстлик кўприги вазифасини ўташига ишонч билдирилди.
Чегараолди савдо зонасида қўшни давлат ишбилармонлари учун барча қулайликлар яратилди. Божхона терминали, меҳмонхона, ресторан ва бошқа шохобчалар афғон ишбилармонлари хизматида. Ҳужжатларнинг «Бир дарча» тамойили асосида тақдим этилиши расмийлаштириш жараёнини тўсиқларсиз, тез ва сифатли амалга оширишда муҳим ўрин тутади.
Бу ердаги павилонларда озиқ-овқат, енгил, чарм-пойабзал, фармацевтика, қурилиш, автомобилсозлик ва бошқа саноат корхоналарида ишлаб чиқарилган уч юз турдан ортиқ тайёр маҳсулот кўргазмага қўйилган. Маросим якунида меҳмонлар ана шу маҳсулотлар билан танишди.
Форум доирасида товар ишлаб чиқарувчиларнинг тақдимотлари ўтказилди. Икки давлат ишбилармонларининг B2B шаклидаги учрашувларида музокаралар ташкил этилиб, ўзаро манфаатли ҳужжатлар имзоланди.
Изоҳ (0)